DILI, 05 dezembru 2022 (TATOLI)— Governu liuhosi Ministériu Interiór (MI), hetan apoia hosi Governu Austrália hodi instala sistema integradu MIDAS hodi fasilita servisu Migrasaun liuhosi meiu dijitalizasaun ba pasajen ilegál sira iha área Terrestre, Portu no Aeroportu.
Sistema MIDAS ne’e hosi International Organization for Migration (IOM), ne’ebé estabelese ona iha nasaun 25 no konsege instala iha Timor-Leste tanba hetan apoia fundu hosi Governu Austrália ho montante millaun $1,5
“Governu instala sistema foun ida ho naran Migration Information and Data Analyst System (MIDAS), ne’ebé ita halo ona lansamentu iha semana kotuk. Sistema ne’e nu’udar projetu pilotu ne’ebé instala iha pontu entrada sira hanesan Sakato, Salele, Portu no Aeroportu atu ajuda Serbisu Migrasaun halo kontrolu ba movimentu ema tama no sai iha territóriu nasionál”, informa Vise Ministru Interiór (VMI), António Armindo, ba Jornalista sira nia nia kna’ar fatin,Caicoli, segunda ne’e.
Kona-ba sistema MIDAS nia-operasaun, Governante ne’e hatutan Sistema ne’e simples atu hala’o atendimentu ho online no laiha problema, difilkudade maka pesoál maka tenke buka aprende.
Iha fatin hanesan, Adjunta Diretór Jerál Serbisu Migrasaun, Interior Inspetora Xefe Polisia Adelaide de Rosa, hateten, nia parte agradese ba Governu tanba instala ona sistema MIDAS bele ajuda serbisu migrasaun nian di’ak liu.
“Ha’u hanoin sistema MIDAS ne’e buat foun, maibé horiseik ha’u akompaña direta pesoál migrasaun ne’ebé halo atendimentu iha aeroportu sira hahú domina ona hodi fo atendimentu online liga ho sistema ne’e rasik, ida ne’e halo halo ha’u kontente loos”, katak.
Jornalista: Natalino Costa
Editór : Florencio Miranda Ximenes
