iklan

NASIONÁL, HEADLINE

Diákonu na’in-haat simu ordenasaun Sacerdotál

Diákonu na’in-haat simu ordenasaun Sacerdotál

Sua Eminência Dom Virgílio Cardéal do Carmo da Silva. Imajen Tatoli/Francisco Sony

DILI, 08 dezembru 2022 (TATOLI)–Diákonu Diosezeanu na’in-haat hanesan Agostinho Peidade Babo, Favelino da Costa, Mariano Quintão do Rego no Rui Aça-Mau, kinta ne’e, simu ordenasaun sacerdotál hodi sai amu-lulik hosi Arsebispu Arkidioseza Metropolitana Dili, Don Virgílio Kardeál do Carmo da Silva SDB, iha selebrasaun festa Imaculada da Conceição Virgem Maria ne’ebé sai mahein ba rai Timór.

Iha ómilia, Eminénsia Arsebispu Arkidioseza Metropolitana Dili, haklaken  katak simu sakramentu orden katak sai Nain-Lulik, sakramentu ne’e fó kbiik no knaar mistériu nian atu hala’o no selebra eukaristia hodi haklaken Maromak futar liafuan.

“Ho ksolok boot ita halibur hamutuk iha ne’e, selebra solenidade Maria Imaculada da Conceição inan sala la’ek ne’ebé nu’udar mahein bá Arkidioseze Dili, Rai doben no kreda Timor nian, ita halibur nu’udar sarani, kreda, hamutuk reza nu’udar Maromak oan atu agradese tanba Maromak Hadomi ita idaidak, maske dalabarak ita la halo tuir nia hakarak”, Don Virgílio Kardeál do Carmo da Silva, hateten iha Igreja Katedral Imaculada da Conceição-Dili.

Eminénsia Don Virgílio hatutan nu’udár ema kriatura ne’ebé sala na’in tenke agradese nafatin ba Maromak tanba dala barak ema fila kotuk no sees-aan hosi Maromak ho laran luak haraik nafatin nia domin ba ema.

“Liuhosi tentasaun ne’ebé ita ema hasoru halo ita sees hosi Maromak no entre ema, ho ema mak Maromak hili feto ida, lori vitória mai iha mundu liuhosi Maria ne’ebé ko’us Jesus Maromak oan, moris la’ós sala buat sira ne’e liuhosi karidade só domin de’it mak ema bele saran ita-nia an ba buat di’ak”.

Biban ne’e, Kardeál ne’e  husu ba diákonu na’in haat ne’ebé simu sakramentu orden atu halo tuir hanesan Maria Virgem, ne’ebé halo tuir Maromak nia hakarak bainhira Anjo São Gabriel lori lia ba nia atu sai Jesus nia-inan.

“Liafuan ne’ebé Maria hataan ba Anjo São Gabriel mak, ha’u mak ne’e halo tuir ita-nia hakarak ba. Nune’e husu ba diákonu na’in haat simu knaar sai amu-lulik nian ne’e hataan hanesan Maria halo tuir Maromak nia hakarak iha vida Nain-Lulik nian”, Don Virgílio husu.

Tanba diákonu ida atu sai amu-lulik sei toba iha rai, ida ne’e la’ós de’it tanba tradisaun, maibé ida ne’e iha sentidu boot hatudu nu’udar ema rai rahun la folin buat ida iha Maromak nia futar oin.

“Sinál ida ne’e hatudu nu’udar folin la’ek, ida ne’e mak hatudu Maromak nia projetu iha ha’u, ho haraik an hateke ba Nain-feto hanesan Maria, ita idaidak buka Maromak nia planu, nune’e ita bele realiza iha ita-nia moris buka buat ne’ebé Maromak buka hosi ita ida ne’e mak hetan ksolok, labele buka tuir saida mak ita hakarak”, katak.

Entretantu, Reprezentante Amu Lulik na’in haat, Padre Agostinho Peidade Babo, hateten atu sai Nai Lulik ne’e prosesu ne’ebé naruk, maibé nia xave mak pasiensia.

“Tanba liuhosi pasiensia mak bele realiza mehi ne’ebé ita iha to’o realiza simu Maromak nia grasa liuhosi sakramentu orden, sai nain-lulik lá fasil no la difísil tanba sé fasil ema barak sai Nai Lulik no se difísil Nai Lulik mós laiha, maibé sai Nai Lulik nia xave mak pasiensia manán buat hotu”, Padre Agostinho afirma.

Iha selebrasaun misa loron Imaculada da Conceição Virgem Maria no ordenasaun ba diákonu na’in haat refere iha mós katekista na’in-22 hosi Dioseze Dili nian ne’ebé durante tinan naruk dedika sira-nia an serví igreja simu kondekorasaun ho medalla no sertifikadu.

Jornalista: Arminda Fonseca

Editór       :  Florencio Miranda Ximenes

iklan
iklan

Leave a Reply

iklan
error: Content is protected !!