KUPANG, 10 dezembru 2022 (TATOLI) – Atleta Taekwondo ho naran kompletu, Jacinta Ote, hosi Rejiaun Administrativa Espesiál Oé-Cusse Ambeno (RAEOA), sábadu ne’e sai manán-na’in iha open turnamen eventu Kepala Kejaksaan Tinggi (KAJATI) halakon atleta ikus Anabela S. Tharamatha hosi PPO distritu Kupang ho kategória iha klase pra-kadet ho todan kilograma 32.
Kompetisaun ne’e kona-bá materia Kyoirugi no Poomsae ba pra-kadet nian ne’ebé realiza iha Gedun Desportu (GOR) distritu Kupang propinsia Nusa Tenggara Timur (NTT) Repúblika Indonézia.
Treinadór Taekwondo RAEOA, Jacob Efi, orgullu tanba atleta ne’ebé konsege hetan primeiru lugar la’ós fasíl, tanba iha klase sira-nian, hamutuk feto na’in-neen.
“Ida ne’e ita agradese tanba atleta hatudu nia tátika ne’ebé durante ita fó treinu ohin iha hetan nia rezultadu halo ita hotu kontenti, tanba atleta ho mentalidade di’ak maski nia maluk sira hamutuk klase ida, ho ain as maibé konsege halakon sira,” Jacob Efi, informa ba Ageyncia Tatoli iha GOR Kupang Indonésia, sábadu ne’e.
Entretantu, atleta Jacinta Ote, moris iha RAEOA iha loron 09 meiu 2013, hosi aman Vitor Fatiman N. Ote no inan Anita Flora da Costa Coçeição. No, hahú envolve sai atleta taekwondo 2021, iha Asosiasaun Taekwondo Rejiaun Oé-Cusse (ATRO), ne’ebé treina hosi treinadór, Jacob Efi.
Tuir kalendáriu ba open turnamen eventu KAJATI realiza durante loron tolu, hahú sesta (9/12) to’o domingo (11/12), no partisipa atu kompete iha eventu ne’e hamutuk dozan 32 ho totál atleta na’in 845. Hosi atleta na’in-845 ne’e maioria mane hamutuk 495 no feto-317 inklui Timor-Leste.
Purtantu ho regulamentu ne’ebé fó sai hosi komisaun organizadora KAJATI mak hanesan, atleta sira compete ho kategória pra-kadet A ba idade tinan neen (6) to’o hitu (7), pra-kadet B ba idade ualu (8) to’o sia (9), pra-kadet C ba idade 10 to’o 11, pra-kadet D ba idade 12 to’o 14, nune’e mós seniór no juniór.
Jornalista : Abílio Elo Nini
Editór : Rafael Ximenes de A. Belo
