iklan

INTERNASIONÁL, DESPORTU, HEADLINE, LIFESTYLE

Sosilito da Cunha sai primeiru lugár iha klase pra-kadet eventu KAJATI

Sosilito da Cunha sai primeiru lugár iha klase pra-kadet eventu KAJATI

Atleta Taekwondo Sosilo S.A da Cunha (mean) kompete hadau primeiru lugár ho atleta Taekwondo hosi Kupaun Imajen Tatoli/Abílio Elo Nini.

KUPAUN, 12 dezembru 2022 (TATOLI) – Sosilito S.A. da Cunha Hadi, ho idade tinan 11 nu’udar atleta Taekwondo pra-kadet reprezenta Rejiaun Administrativa Espesiál Oé-Cusse Ambeno (RAEOA), susesu hetan primeiru lugár liuhosi kompetisaun Taekwondo iha eventu Kepala Kejaksaan Tinggi (KAJATI) ne’ebé realiza iha Nusa Tenggara Timur (NTT), Repúblika Indonézia.

Sosilito S.A. da Cunha Hadi, moris iha Oé-Cusse loron 29 maiu 2011, hosi aman Sosilo Hadi Bernardo no inan Verónica C. da Cunha. No daudaun ne’e hala’o hela estudu iha CAFE Oé-Cusse klase 6, no hahú nia atividade desportu hodi envolve Taekwondo iha 2020 treinu iha Asosiasaun Taekwondo Oé-Cusse to’o ohin loron.

Atleta Taekwondo Sosilo da Cunha sai primeiru lugár iha eventu KAJATI Kupaun. Imajen Tatoli/Abílio Elo Nini.

Nune’e iha domingu ne’e, Sosilito S.A. da Cunha, partisipa hodi kompete ho nia maluk atleta Taekwondo sira eventu (KAJATI) ne’ebé realiza iha Gedung Desportu Kupauj, provínsia Nusa Tenggara Timur (NTT), Repúblika Indonézia.

Iha eventu ne’e, Sosilito S.A. da Cunha, liu selesaun iha klase pra-kadet hamutuk na’in-haat ho todan hanesan kilograma 26. Atleta na’in-haat ne’e mak hanesan, Sosilito S.A. da Cunha hosi RAEOA, Michael Dadu, atleta hosi distritu Kupaun, Remigius, atleta Amfotis hosi GOR Belu, no Chiko Yan Sayd, atleta hosi PPO Kupaun.

Durante iha kompetisaun Sosilito da Cunha, sorti di’ak tanba konsege halakon atleta na’in-tolu ne’e, no ofisialmente sai primeiru lugár iha klase pra-kadet C open turnamen eventu KAJATI NTT.

Nia agradese ba nia aman tanba durante nia prezensa iha Kupaun konsege enkoraja hodi esforsu atu hetan rezultadu iha eventu ne’e, tanba prezensa Taekwondo RAEOA iha Kupaun la’ós klubu maibé reprezenta Oé-Cusse.

“Ha’u sente kontenti tebes, tanba mai hosi dook mai to’o Kupaun la saugate, no rezultadu ne’e ha’u hamorin ona Oé-Cusse nia naran iha eventu KAJATI NTT, no ha’u la haluha agradese ba ha’u-nia apá ho amá tanba durante ne’e enkoraja no apoiu ha’u atu mai kompete iha eventu ne’e,” Sosilito S.A. da Cunha, espresa nia sentimentu ksolok ne’e iha GOR Kupaun NTT.

Iha fatin hanesan, Sosilo Hadi Bernardo, nu’udar aman haksolok ho rezultadu ne’e tanba nia oan reprezenta Oé-Cusse kompete iha eventu KAJATI.

“Foin daudaun ne’e ha’u mai akompaña nia hamutuk ho nia treinadór sira, tanba nia ain kanek, tuir loloos ha’u atu kansela ona, maibé ha’u sente todan, tanba labarik sira mai lori Oé-Cusse nia naran, entaun ha’u tenke esforsu, hola ai-moruk, buka hahán ne’ebé nia gosta, hodi fó hanoin nafatin atu oinsá bele hetan juara,” nia katak.

Entretantu kalendáriu open turnamen eventu KAJATI realiza durante loron tolu, hahú iha sesta (9/12) to’o domingu (11/12), no partisipa atu kompete iha eventu ne’e hamutuk dozan 32 ho totál atleta na’in 845. Hosi atleta na’in-845 ne’e maioria mane hamutuk 495 no feto-317 inklui Timor-Leste.

Purtantu ho regulamentu ne’ebé fó-sai hosi komisaun organizadora KAJATI mak hanesan, atleta sira kompete ho kategória pra-kadet A ba idade tinan neen (6) to’o hitu (7), pra-kadet B ba idade ualu (8) to’o sia (9), pra-kadet C ba idade 10 to’o 11, pra-kadet D ba idade 12 to’o 14, nune’e mós senior no juniór.

Notísia relevante: Carel da Costa hosi RAEOA kontente hetan segundu lugár iha eventu KAJATI

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!