Xefe suku husu Governu apoiu fasilidade uma maternidade iha Ossú

DILI, 12 dezembru 2022 (TATOLI)–Xefe suku Ossú de Cima, postu administrativu Ossú, munisípiu Viqueque, Celestino Monteiro de Gama, hateten rekomenda ba Ministériu Saúde (MS) atu apoiu fasilidade saúde hanesan uma maternidade ba inan-isin rua iha Ossu.
“Fasilidade saúde iha ha’u-nia postu administrativu Ossú to’o agora laiha uma maternidade, ita nia inan-feton sira balun partu iha dalan no até labele salva bebé nia vida tanba ho distánsia dook. Ne’ebé ami rekomenda ba MS atu aselera mós ami nia fasilidade liu-liu uma maternidade,” Xefe suku ne’e hatete ba Agência Tatoli, hafoin partisipa sorumutu nasionál buka dalan alternativu ba dezafiu sira liu-liu setór agrikultura, saúde, edukasaun, bee-moos iha ámbitu komemorasaun loron direitu umanu ba dala-75 iha Salaun Luz Clarita, Dili.
Tuir nia, uma maternidade ba inan-isin rua iha postu saúde Ossú laiha, nune’e bainhira inan-isin rua atu partu tenke ba Viqueque no se lae ba Ospitál Referál Eduardo Ximenes Baucau.
Xefe Suku ne’e husu na’in-ulun sira labele ba tuur de’it iha ne’eba atu hanoin mak osan ne’e bainhira mak tama, maibé tun ba terrenu no halo netik fiskalizasaun atu haree povu nia kondisaun.
Xefe Suku Iriheu, postu Ermera Vila, Felisberto Soares Ximenes, hateten fasilidade saúde iha Ermera kuaze postu neen (6) maibé pesoal saúde mak menus tebes.
“Ami iha postu saúde 20 no mós kolokadu médiku sira ba iha suku sira, kada suku ida ami hetan doutor ida no parteira ida maibé seidauk sufisiente. Se bele planu Governu nian iha futuru bele tau importánsia ba konkursu saúde sira,” nia dehan.
Enkuantu xefe suku Buruma, Baucau Vila, Liborio Freitas hateten, to’o ohin loron sentru saúde hotu-hotu sei halerik ba ai-moruk inklui fatin kona-ba atu halo atendimentu.
Jornalista : Osória Marques
Editór : Cancio Ximenes

