AMD presiza koloka pesoál seguransa permanente iha área turistiku Cristo Rei

DILI, 15 dezembru 2022 (TATOLI)—Pesoál limpeza hosi postu administrativu Cristo Rei, Cancio da Silva, hateten Governu liuhosi Autoridade Munisípiu Dili (AMD) presiza koloka  pesoál seguransa iha área turístiku Cristo Rei atu asegura vizitante sira-nia seguransa iha área refere.

“Governu ne’e rekruta ema fila-fila ona maibé ema la halo tuir dever atu mai serbisu ne’e kumpre servisu no autoridade hasai tiha ona entau tenke buka fali ema seluk. Tanba, uluk seguransa sívil hosi Governu nian mai iha ne’e, maibé sira dada tiha hotu no loloos tenke uza sira ne’e para mai serbisu duni, ne’e mak di’ak,” Cancio da Silva hateten ba Âgencia Tatoli bainhira hala’o limpeza iha jardin Cristo Rei, kinta ne’e.

Tuir nia, laiha pesoál seguransa rezulta situasaun dezorganizadu iha área Cristo Rei ne’ebé sai nu’udar área turistiku no protejida.

“Iha jardin Cristo Rei ne’e ami sempre akompaña, tanba situasaun ne’e akontese beibeik sira (vizitante) para motor iha jardin laran no motor tama to’o uma oan laran ne’eba. Aleinde ne’e mós, karreta loloos labele para iha estrada tenke para tuir liña ne’ebé iha ona. Ne’ebé, tenke iha duni seguransa atu tau matan ba asuntu sira-ne’e, se lae vizitante sira para karreta ka motor ne’e arbiru de’it,” nia hatutan.

Tanba, pesoál seguransa ida-ne’ebé Governu kontrata mantein hala’o serbisu iha área Cristo Rei ne’e, dala ruma nia hala’o serbisu no dala ruma mós la tama serbisu entaun ida-ne’e mak sai preokupasaun ida ba sira, tanba Autoridade Munisípiu Dili (AMD) la kontrola.

“Sira pesoál seguransa iha ekipa boot ida maibé nia mesak oan ida, dala ruma mai no dala ruma la mai. Ohin, nia tama, aban nia la tama, hanesan laiha vontade atu serbisu. Depois sira hosi Autoridade Munisípiu Dili (AMD) mós nunka mai atu kontrola ka halo observasaun ba pesoál seguransa sira-nia servisu,” nia hateten.

Nia sujere, atu iha instrusaun ruma ba ema-ne’ebé Governu tau fiar hodi serbisu iha área turistiku refere.

“Pesoál seguransa ne’e, dala ruma nia mai hanesan tuur loos de’it, lakohi siak ema no dala ruma sira tenke iha instrusaun hosi Autoridade Munisípiu Dili (AMD) katak tenke hasee atu ema labele halo asaun arbiru iha jardin Cristo Rei. Se lae, mai depois mai mós tuur loos de’it halo nusa ita atu koopera malu,” nia hateten.

Pesoál limpeza ne’e mós husu atu ema-ne’ebé asina ona kontratu, maibé la halo tuir nia kna’ar tenke hasai hosi nia servisu, tanba nasaun ne’e atu dezenvolve presiza ema-ne’ebé serbisu duni mak hetan nia direitu.

“Ita hotu-nia hanoin, ema ne’ebé asina tiha ona kontratu nia la tama, ita labele aseita bebeik nia atu fó serbisu ida-ne’e ba nia, entaun ita tenke kansela ka hasai tiha nia. Ne’ebé hanesan iha oportunidade ba ema seluk karik, sei bele mai serbisu bele aproveita ba,” nia sujere.

Entretantu liga fali ba serbisu hosi pesoál limpeza sira-nian iha área Cristo Rei (CR), nia afirma daudaun ne’e komesa iha ona kooperasaun di’ak entre pesoál limpeza sira no vizitante sira ne’ebé vizita fatin refere.

“Ami sempre aviza ba vizitante sira ne’ebé halo serimónia ruma iha ne’e, bainhira sira-nia serimónia remata no molok fila sira tenke limpeza fatin ne’ebé sira uza. Ida-ne’e, sira halo tuir. Tanba, uza fatin sira-ne’e gratuita de’it, entaun imi uza hamoos tiha mak foin bele fila. Sira halo tuir no balun ne’ebé mai beibeik sira kompreende, maibé oin foun sira la kompreende,” nia hateten.

Aleinde ne’e, dala barak joven sira uza jardin Cristo Rei hodi pasa tempu ho sira-nia belun hodi hemu tua iha Cristo Rei nia sorin iha foho hun, pesoál sira nafatin fó hanoin mantein ambiente moos no sira obedese.

“Nune’e, joven sira mak hemu tua no balun tunu naan iha tesik ba sorin ne’ebá mak halo fo’er ,ami tuir ba fo hatene no sira hamoos. Lixu sira-ne;e redús uitoan tanba bainhira ami hamoos ne’e, sira mós ajuda ami atu hamoos,” nia hateten.

Nia sujere liu atu Governu bele halo lei ruma, nune’e regula karik ema ruma vizita área turistiku Crsito Rei bele kontribui hodi selu hanesan mós nasaun seluk, nune’e osan ne’e bele rai ba kofre Estadu

Entretantu, tuir pesoál ne’e katak, durante nia halo servisu hanesan pesoál limpeza iha área Cristo Rei, sempre toman vizitante sira sempre selebra serimónia agradesimentu ba graduasaun, no festa aniversáriu.

Jornalista : Nelia Fernandes

Editór       : Cancio Ximenes