DILI, 20 dezembru 2022 (TATOLI)—Asosiasaun Santalum hala’o atividade kuda ai-horis hamutuk 580 iha área protejida Tasi-tolu, tersa ne’e.
Diretór Asosiasaun Santalum, Adalberto Higino Belarmino, hateten, ai-horis ne’ebé ohin kuda iha área tasi ibun Tasi-tolu, iha sentru kuarentena COVID-19, ho objetivu fó matak no konserva área ne’e.
“Tinan ne’e, ita kuda ai-horis ba rai ektare rua, parte foho hamutuk 1.030 no área tasi ibun ohin ita kuda 580,” Adalberto Higino, informa iha ámbitu kuda ai-horis iha Tasi-tolu.
Ai-horis ne’ebé kuda hanesan ai-kakeu foho, ai-kakeu tasi, ai-na, lamtoro no mimba, nune’e ektare ida ho balun kuda iha foho no seluk kuda iha parte tetuk.
“Ami kuda ai-horis sira ne’e tanba ho hanoin presiza tebes halo reflorestaun ba área kosteiru, tanba mudansa klimátika ameasa tebes, enkuantu Dili nu’udar kapitál nasaun ita tenke halo reflorestasaun nune’e bele fó oxijéniu di’ak ba kapitál laran,” nia tenik.
Notísia relevante: Mota sobu uma tolu no estraga ai-horis iha Ulmera
Atividade refolorestasaun ne’e hala’o tanba serbisu hamutuk ho empreza Bayu-undan, Santos inklui Ministériu Agrikultura no Peska (MAP) liuhosi Diresaun Jerál Floresta.
“Ami hetan apoiu fundu $42.000 hosi empreza Santos iha tinan ne’e. Orsamentu sira ne’e ami halo atividade hanesan manutesaun ba ai-horis sira ne’ebé kuda ona iha Dili no Liquiça Ulmera, inklui selu saláriu hotu,” Diretór informa.
Ai-horis ne’ebé kuda iha Tibar, Ulmera no Tasi-Tolu desde tinan 2007 to’o 2022, ne’ebé bele fó ona mahon ba ema.
“Tinan ne’e ita kontinua kuda iha Tasi-tolu no tinan oin hakarak kuda ai-horis sira ne’e ba área tasi-ibun ne’e hotu kedas,” nia dehan.
Diretór Santalum husu komunidade ne’ebé hela iha área Tasi-tolu tenke koopera proteje ai-horis sira ne’ebé kuda ona, nune’e iha futuru bele fó mahon di’ak ba ema hotu.
Asosiasaun Santalum nu’udar organizasaun sosiedade sivil nasionál ne’ebé hala’o nia knaar iha área floresta, agrikultura no meiu ambiente durante tinan 15 nia-laran no halo ona servisu hamutuk ho projetu Bayu-undan no tama ona tinan datoluk halo parseria ho Santos iha área reflorestasaun.
Jornalista : Arminda Fonseca
Editora : Julia Chatarina
