DILI, 20 dezembru 2022 (TATOLI)—Administradór postu administrativu Fatumea, Geraldo Orleans, hateten Governu liuhosi Ministériu Solidariedade Sosiál no Inkluzaun (MSSI) finaliza ona halo pagamentu subsídiu fim do ano $200 ba uma kain iha postu administrativu Fatumea, munisípiu Covalima.
“Pagamentu subsídiu fim do ano $200 ba uma kain iha postu administrativu Fatumea iha suku Nanu no Fatumea, pagamentu finaliza iha segunda (19/12) no tersa (20/12) ohin kontinua iha suku Belulik Leten mós ohin finaliza ona,” Geraldo Orleans informa ba Agência Tatoli liuhosi Telfónika, tersa ne’e.
Pagamentu subsídiu fim do ano $200 kada uma kain iha postu administrativu Fatumea finaliza maibé durante pagamentu xefe suku sira simu keixa hosi benefísiáru sira.
Keixa ne’ebè mak xefe suku sira simu mak hanesan balun iha uma kain ida, xefe família sira mate ona nune’e halo reklamasaun maibé sei administradór rasik seidauk simu relatóriu.
“Durante halo pagamentu subsídiu fim do ano $200 ba uma kain ne’e, xefe suku simu keixa reklamasaun hosi benefisiáriu. Aban, xefe suku sira sei halo rezumu hodi relata dadus mai ha’u kona-ba reklamasaun no komunidade hato’o keixa balun xefe família mate,” nia dehan.
Ho nune’e, foin lalais hala’o ona enkontru ho diretór Jerál hosi Ministériu Administrasaun Estatál (MAE) bainhira halo pagamentu benefisiáriu laiha naran ka iha problema ruma xefe suku sira tenke halo reklamasaun.
Totál benefisíáriu iha postu administrativu Fatumea, xefe família na’in-10,41 hosi suku Fatumae, Nanu no Belulik Leten.
Jornalista : Celestina Teles
Editór : Cancio Ximenes
