Taxa ezekusaun OJE 2022 hosi MESSK atinje 95,1%
DILI, 20 dezembru 2022 (TATOLI)—Taxa ezekusaun Orsamentu Jerál Estadu (OJE) 2022 hosi Ministériu Ensinu Superiór Siénsia no Kultura (MESSK) ba kompromisu, obrigasaun no atuál atinje ona 95,1%.
“Ita-nia alokasaun ba Orsamentu Jerál Estadu tinan 2022 hamutuk $5.379.350, hosi orsamentu ne’ebé iha ita konsege ezekuta ona millaun $4.545.438,” Diretór Jerál Administrasaun no Finansa interinu, Droaldo Morais, relata liuhosi aprezentasaun relatóriu avaliasaun ministériu, iha salaun Delta Nova, Comoro, tersa ne’e.
Daudaun orsamentu ne’ebé sei iha hela obrigasaun $506.977, kompromisu $1.213,89 no atuál $4.609.338,37, enkuantu hosi totál balansu hela de’it $261.879,60
“Balansu ne’ebé iha sei sei ezekuta de’it ba saláriu no vensimentu ba funsionáriu públiku, ajente administrasaun públika inklui apontamentu polítiku sira ba direitu désimu terseiru nian,” nia akresenta.
Notísia relevante: MESSK hakarak IESPP 18 kria kursu fasilita joven asesu serbisu
Tuir Diretór, bainhira ministériu halo ona pagamentu saláriu fulan-dezembru nian, maka kresimentu ezekusaun orsamentu bele sa’e ba 97% tanba normalmente kategoria saláriu no vensimentu ninia pursentajen sei kontribui 10%.
“Maibé presiza haree mós ba kategoria bens no servisu ho atuál millaun $2,5 inklui obrigasaun $315.791 ne’ebé prevee hodi halo kontratu termu sertu ba asesór sira ne’ebé maka seidauk hetan pagamentu hamutuk na’in-100 resin. Ita mós foti ona orsamentu balun hosi fundu retifikativu hodi halo pagamentu no osan balun bele filafali ba saldu. Ita presiza haree tanba bele kontribui ba prosesu kresimentu,” nia esplika.
Iha biban hanesan, Ministru Ensinu Superiór Siénsia no Kultura, Longuinhos dos Santos, konsidera taxa ezekusaun ministériu hatudu dezempeñu di’ak.
“Ha’u hakarak hateten ba ita-boot sira, ita-nia taxa ezekusaun bele dehan diresaun hotu-hotu tama iha zona azul, signifika ita-boot sira hotu ninia dezempeñu servisu muito bom,” Ministru tenik.
Governante ne’e dehan, iha ministériu haat maka ninia taxa ezekusaun atinje ona 95%, ezekusaun boot liu maka Ministériu Administrasaun Estatál (MAE) 97,8%, Ministériu Antigu Kombatente no Libertasaun Nasionál (MAKLN) 96%, Ministériu Solidariedade Sosiál no Inkluzaun (MSSI) 95,3% no MESSK 95,1%.
“Hakarak dehan de’it katak ministériu ida-ne’e foin maka harii iha mandatu VIII Governu Konstitusionál, ho rai-rahun inklui dezafiu oin-oin tanba estrutura la kompletu. Maibé maski ho kapasidade mínimu aumenta ho ita boot sira-nia kapasidade hamutuk sai forsa. Iha tinan 2021, ita-nia ezekusaun OJE konsege atinje 93% maibé iha tinan ida-ne’e sa’e ba 95,1%. Ne’e atu hatudu katak ita-nia dezempeñu la’ós tun maibé aumenta. Nu’udar superiór, ha’u hakarak kongratula esforsu hotu ne’ebé diresaun sira hatudu ona hamutuk ho funsionáriu tomak hodi organiza atividade sira to’o atinje taxa ezekusaun iha programa sira ne’e ho susesu,” nia tenik.
Ministru louva tanba dirijente no funsionáriu sira hatudu ona forsa, ne’ebé nu’udar meiu atu tulun Ministru no Sekretáriu Estadu ninia mandatu nu’udar membru Governu durante períodu termina.
“Ami na’in-rua mai hosi polítika hanesan instrumentu atu hala’o programa sira ne’ebé iha sustentabilidade ba dezenvolvimentu iha Timor-Leste. Tanba ne’e, ha’u husu ba funsionáriu sira hotu iha kada diresaun atu nafatin servisu ho responsabilidade tanba ita-boot sira maka sei nafatin mantein iha fatin ida-ne’e maski Governu ida ba seluk mai fali,” nia hameno.
Biban ne’e, Ministru husu atu asegura nafatin servisu sira hanesan ema profisionál atu tau-matan nafatin ba progresu sira iha kada diresaun hotu tanba konfiansa ne’ebé funsionáriu sira hetan iha mandatu VIII Governu ne’e sei lori atinje karreira ida di’ak liután iha futuru.
Jornalista : Tomé Amado
Editora : Julia Chatarina
