MSSI Oé-Cusse sei submete lista reklamante hafoin konklui pagamentu
OÉ-CUSSE, 28 dezembru 2022 (TATOLI)–Xefe Departamentu Ministériu Solidariedade Sosiál no Inkluzaun (MSSI) RAEOA, Adelino Cau, hateten ninian parte sei submete lista reklamante subsidiu $200 ba Governu Sentrál hodi konsidera hafoin konklui pagamentu.
Nia haktuir, durante pagamentu la’o desde abertura iha 21 dezembru to’o daudaun ne’e iha preokupasaun barak hosi komunidade no autoridade komunitáriu sira kona-bá uma-kain balu la simu subsidiu tanba naran laiha.
Nia hatutan, hosi parte MSSI iha Oé-Cusse simu ona lista balun, maibé seidauk bele responde imediata, tanba sei submete fali ba nasionál atu deside.
“Família ne’ebé kaben ikus sira-nia naran la tama iha livru rejistu nivél aldeia, tanba rejistu ne’e mai to’o iha janeiru 2022 no taka livru ne’e iha fevereiru, kuandu kaben iha fevereiru mai leten sira sei la hetan subsídiu ne’e, entaun sira sei hein fali rejistu foun iha 2023,” Adelino Cau ba Tatoli iha Oé-Cusse, kuarta ne’e.
Tuir nia, karik sira-ne’ebé kaben kleur ona maibé naran la sai atu simu subsídiu ne’e, la’ós falla hosi MSSI ka Governu, maibé komunidade mak sala, tanba antes ne’e lakohi koopera ho xefe suku no aldeia sira atu rejistu naran iha suku.
“Entaun bainhira ofisiál tékniku hosi MSSI halo pagamentu iha suku kuandu naran laiha lista, ami labele selu, maibé ami prepara dokumentu ba reklamante atu rejistu depois, pagamentu hot-hotu remata ita halo relatóriu submete fali ba nasionál mak deside atu selu ka oinsá,” nia afirma.
Tanba osan ne’e konta kedas hosi Ministériu Finansa (MF) ba númeru ne’ebé rejista iha livru família iha aldeia suku ida-idak, ne’ebé ami laiha direitu atu halo pagamentu kuandu naran la rejistu, ami selu bazea ba naran sira-ne’ebé rejista ona.
Nia informa, tuir kaléndariu pagamentu subsídiu iha RAEOA hahú iha 21 no sei ensera iha 30 dezembru 2022, maibé kuandu beenfisiáriu sei iha entaun estende tán to’o loron 04 janeiru 2023.
Xefe departamentu ne’e la esplika detalla kona-bá totál númeru reklamante iha RAEOA, tanba daudaun ne’e ekipa sei halo hela pagamentu iha suku, bainhira konklui maka sei anúnsia kona-bá númeru uma-kain hira maka sai reklamante.
Entretantu, bazea ba dekretu-lei númeru 37/2022, loron 25 maiu, artigu 2, kona-bá benefisiáriu sira ba subsidiu ne’e hanesan uma-kain sira-ne’ebé rejistadu ona iha livru rejistu uma-kain iha suku iha territóriu nasionál tuir termu previstu iha diploma ministeriál númeru 47/2017, 23 agostu.
Ba efeitu númeru anteriór, konsidera katak hirak ne’ebé rejistadu ona iha livru rejistu uma-kain ne’e hanesan sira-ne’ebé mak rejistu ona uma-kain no rejistu válidu to’o 28 agostu 2022.
Jornalista : Abílio Elo Nini
Editora : Rita Almeida
