Governu realiza bazar baratu hodi festeza Natál no Tinan Foun

DILI, 30 dezembru 2022 (TATOLI)—Governu liuhosi Autoridade Munisípiu Dili iha inisiativa realiza bazar baratu ba negosiante sira hodi faan sira-nia sasán iha Golgota no Eis-Merkadu Caicoli, hodi festeza festa Natál (25 dezembru 2022) no Tinan Foun (01 janeiru 2023).
“Merkadu baratu ami organiza iha fatin rua (2), ida hetan apoiu hosi Ricardo Nheu ne’ebé fó nia fatin iha Golgota atu negosiante sira-ne’ebé faan iha Kampung Baru muda hotu ba ne’ebá. Entaun, ami koordena hamutuk ho Polísia eskuarda Dom Aleixo hodi muda sai vendedór sira hosi merkadu Kampung Baru tun mai kruzamentu Nicolau Lobato, ami muda tama tiha ba laran. Agora ida fali, ami organiza hosi eis-merkadu iha suku Caicoli aranja fatin fó ba sira no halo ona abertura iha 22 dezembru, ida-ne’e bolu bazar baratu,” Diretór Servisu Munisipál Jestaun Merkadu no Turizmu, Arthur Henriques, hateten ba Agência Tatoli, liuhosi telefónika, sesta ne’e.
Munisípiu Dili organiza ka realiza bazar baratu mak atu fó kondisaun ba negosiante sira bele festeza iha loron natal no tinan foun, nune’e bele hetan rendimentu.
“Tanba, sira faan iha estrada públiku no trotoár leten, entaun ami iha duni inisiativa rasik bolu sira hamutuk no organiza fatin fó ba sira. Entaun, iha eis-merkadu Caicoli, agora kuaze familia 60. Maibé iha Golgota bele to’o ona 800, tanba vendedór ami muda hosi ne’ebá 266 no aumenta tan sira iha ne’ebá provolva 500,” nia informa.
Tuir nia, muda vendedór hosi Kampung Baru ba Golgota hahú kedas iha 20 to’o 22 no Autoridade Munisípiu Dili kontinua monotoriza.
“Maibé, bazar baratu iha eis-merkadu Caicoli ami organiza vendedór sira iha 18-22 dezembru, ami halo abertura,” nia dehan.
Tanba ne’e, bainhira Autoridade Munisípiu Dili liuhosi Servisu Munisipál Jestaun Merkadu no Turizmu realiza merkadu baratu, negosiante sira sente kontente no hato’o agradesimentu ba Governu tanba bele halo atividade negósiu.
“Iha prosesu muda vendedór ba merkadu baratu, sira sente kontente tanba Governu liuhosi Autoridade Munisípiu Dili iha inisiativa rasik organiza sira, hodi harii kondisaun atu sira faan sira-nia sasán hodi festeza loron boot natál,” nia dehan.
Entretantu, tuir observasaun jornalista iha terenu nota katak negosiante sira-ne’ebé halo atividade negósiu iha merkadu baratu iha eis-merkadu Caicoli, negosiante sira halo duni atividade negósiu iha fatin refere.
Jornalista : Nelia Fernandes
Editór : Cancio Ximenes

