Governu atribui aihan nutritivu ba inan fó susu no labarik sira
DILI, 05 janeiru 2023 (TATOLI)—Governu Japaun liuhosi Organizasaun Aihan Mundiál Nasaun Unida (WFP, sigla inglés) hamutuk Ministériu Solidariedade Sosiál no Inkkuzaun (MSSI), kinta ne’e, distribui aihan nutritivu ba inan fó susu no labarik tinan ida mai kraik.
Notísia Relevante: MTKI-MS halo konsulta nasionál kria Dekretu-Lei fortifikasaun aihan
“Ohin ita iha ne’e ho ita-nia Governu Japaun apoiu orsamentu kuaze millaun $3 liuhosi WFP no sira fó tipu sasán mak hanesan koto, mina no foos. Programa ne’e komplementár ba ita-nia programa bolsa da mãe jerasaun foun,” Vise Ministra Solidariedade Sosiál no Inkkuzaun (MSSI), Signi Verdial, hateten ba jornalista sira hafoin halo lansamentu ba aihan nutritivu ba inan fó susu no labarik tinan ida mai kraik, iha sede suku Wenunuk, Metinaro, kinta ne’e.
Objetivu hosi programa ne’e atu halo investimentu ba dezenvolvimentu ba kapitál umanu ne’e tanba futuru nasaun ne’e nian mak inan isin-rua ho labarik sira, tanba ne’e presiza konsumu ba aihan nutritivu ne’ebé mak nakonu ho mineral.
Embaixadór Japaun iha Timor-Leste, Kinefuchi Masami, hateten sira-nia parte distribui ona aihan nutritivu tonelada rihun rua mak hanesan koto, foos no mina ba ema hamutuk 4.000.
“Nu’udar embaixadora Japaun, ha’u sei garante katak Governu no povu nasaun Japaun sei kontinua sai belun ho Timor-Leste hodi fó apoiu aihan nutritivu ba ema vulnerável sira ,” nia dehan.
Representative and Country Director World Food Programme (WFP), Alba Cecilia Garzon Olivares, hateten programa aihan nutritivu ne’e oferese ba inan fó susu no ba labarik idade tinan ida mai kraik.
“Ohin ita halo lansamentu no ita-nia alvu ba inan fó susu no labarik tinan ida mai kraik, tanba liuhosi aihan nutritivu hodi bele hadi’a sira-nia nutrisaun. No, to’o agora benefisiáriu ba aihan nutritivu 30.000-resin ona,” nia dehan.
Benefisiáriu ba aihan nutritivu hamutuk 30.000-resin ne’e hela iha munisípiu Baucau, Manatuto, Dili, Covalima, Ermera no munisípiu Manufahi.
Xefe Suku Wenunuk, Simão Mendonça, hateten labarik ho inan fó susu besik 300 mak simu ona aihan nutritivu ne’e.
“Ami agradese ba parseiru liuhosi MSSI hodi apoiu aihan nutritivu ba inan fó susu labarik sira iha Timor-Leste tanba nutrisaun ne’e importante ba sira,” nia dehan.
Jornalista : Osoria Marques
Editór : Cancio Ximenes
