BOBONARO, 06 janeiru 2023 (TATOLI) – Ministériu Agrikultura no Peska (MAP) liuhosi diresaun nasionál irrigasaun prepara ona atu mobiliza ekipamentu pezadu eskavador iha tempu badak atu normaliza kanál irrigasaun tradisionál Mabil-Gol, suku Tapo-Memo, postu administrativu Maliana, munisípiu Bobonaro.
Irrigasaun antigu ne’e sai hanesan preukupsaun ba agrikultór suku Tapo-memo atu halai natar iha époka dahuluk tinan 2023, tanba hetan estragu hosi inundasaun no erozaun hafoin akontese udan-boot iha tinan kotuk.
Diretór MAP Munisípiu Bobonaro, Alberto Gomes Lopez, haktuir, kondisaun irrigasaun ne’e hafoin hetan estragu, direjente ministériu nian haree rasik ho matan.
Notísia relevante: MAP ke’e ona kanál irrigasaun tradisionál iha Tapo-Memo
‘Ita-nia ekipamentu preparadu, loloos ne’e mai ona iha semana ulu, maibé tanba ita sei loron boot tinan foun, entaun ita fiar katak semana ida-ne’e nasionál sei mobiliza ekipamentu mai halo normalizasaun, nune’e tempu badak ita-nia natár na’in sira bele utiliza bee ne’ebé maka hosi irrigasaun Maliana II,” Alberto Gomes Lopez, informa ba jornalista sira, iha Maliana.
Nia subliña, intervensaun ne’e atubele fornese bee ba natar komunidade sira-nian,n une’e sira bele aproveita udan-been halai natar antes bee menus.
“Ha’u atu fó hanoin ba ita-nia komunidade natar na’in sira, labele taridu, pasiénsia oituan lai, tanba semana ida-ne’e ita-nia ekipamentu eskavator ne’e mai ona halo normalizasaun,” nia apela.
Enkuantu kona-bá durante ne’e agrikultor sira hola inistiva ke’e kanál irrigasaun antigu ne’e, utiliza ai-suak, enxada no sekop.
Hatán ba preokupasaun ne’e, Diretór Alberto, dehan posiblidade iha tempu badak diresaun munisípiu sei halo manutensaun kiik.
Nia relata, kondisaun irrigasaun Maliana II, dadaun ne’e iha prosesu aprivizionamentu no hafoin kolleta époka haduluk 2023 nian hahú ona halo reabilitasaun.
“Reablitasaun ne’e sei hahú hosi Intek Malibaka sei to’o iha Tunubibi ho distánsia maizumenus kilómetru 6, ne’e mak ministériu hanoin atu halo reabilitasaun totál ba irrigasaun boot ida-ne’e,” nia katak.
Notísia relevante: Komunidade Maliana Halerik Kondisaun Estrada-Irrigasaun
Jornalista : Sérgio da Cruz
Editór : Evaristo Soares Martins
