SEFOPE realiza formasaun preliminár ba kandidatu traballadór timor-oan 211
DILI, 09 janeiru 2023 (TATOLI)—Sekretaria Estadu Formasaun no Profisionál no Empregu (SEFOPE) liuhosi Diresaun Nasionál Empregu Exteriór (DNEE), segunda ne’e, realiza formasaun preliminár ba kandidatu traballadór timor-oan na’in-211 ne’ebé naran tama ona sistema atu bá serbisu iha Koreia Súl.
Diretór Nasionál Empregu Exeteriór, Filomeno Soares, hateten, formasaun ne’e hanesan atividade preprasaun ida ba kandidatu traballadór sira molok atu bá servisu iha rai-li’ur.
“Ita hamutuk ho Korean Student Language Program (KSLP) fó formasaun ba ita-nia kandidatu traballadór hamutuk 211 ne’ebé kontratu tama atu bá serbisu iha tinan ne’e,” Diretór informa iha salaun Parokiál Igreja Becora.
Formasaun ne’e kona-ba kultura, disiplina no ambiente serbisu iha Koreia Súl hanesan respeita ema-nia lei, kultura, no labele halai ses hosi sistema, nune’e traballadór bele hatene ambiente foun molok tama serbisu.
“Ha’u husu ba kandidatu traballadór sira ne’ebé hetan ona oportunidade, atu hadook-an hosi ransu livre no kuidadu saúde, tanba bainhira deteta moras hanesan sipilis, TBC, Hepatitis no halo krime, mak sei halo kanselamentu,” nia tenik.
Notísia relevante: Governu despede traballadór timor-oan 100 bá serbisu iha Koreia Súl
Formasaun preliminár ne’e hala’o durante loron-lima, nune’e Diretór ne’e husu ba kandidatu traballadór sira atu aproveita ho didi’ak hodi apreende.
“Sesaun ida-ne’e sei lori imi atu hatene kultura no ambiente serbisu iha Koreia Súl. Kontratu ba ita-nia kandidatu traballadór sira mai hotu ona, kada ema serbisu másimu tinan-haat fulan-ualu no mínimu tinan-tolu, no saláriu iha ne’ebá mínimu $1.700, maibé traballadór agora kuaze fulan-ida hetan $2.000,” Diretór esplika.
Iha fatin hanesan, kandidatu traballadór, Remésio Pinto, kontente bele partisipa iha formasaun preliminár ne’e tanba bele ajuda hatene ambiente no kultura Koreia.
“Formasaun ohin atu prepara ami molok atu bá serbisu tanba ita hotu hatene ambiente Koreia Súl la hanesan ho ita-nian. Ha’u agradese ba Governu tanba bele fasilita ona fó formasaun,” nia salienta.
Jornalista : Arminda Fonseca
Editora : Julia Chatarina
