DILI, 17 janeiru 2023 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten eleisaun parlamentar 2023 ne’e sei hala’o tuir konstituisaun Repúblika Demokrátika Timor-Leste (RDTL) haruka.
Notísia Relevante: STAE apela ba sidadaun TL partisipa iha resensiamentu eleitorál
“Kona-ba eleisaun parlamentar ne’e, STAE hakarak halais ko tuir prosesu normál, ne’e primeiru STAE hanoin katak órgaun Estadu ida-ne’e konserteja katak saida mak hala’o ne’e bazea ba konstituisaun no tuir lei ne’ebé vigora,” Diretór Jerál STAE ne’e hateten ba Agência Tatoli liuhosi programa Entrevista Eskluziva iha studio Faról, segunda ne’e.
Iha tinan polítika ka tinan eleitorál ne’e, nia dehan, STAE tenke halo preparasaun tuir siklu pre-eleitorál, siklu pos eleitorál no mós siklu eleitorál nian tanba iha aspeitu tékniku oinsa atu garante eleisaun ne’ebé justu no kredivél ne’e fatór tempu mak importante.
“Iha aspetu tékniku, ha’u hanoin oinsá atu garante eleisaun ne’ebé justu no kredivél mak fatór tempu ne’e importante,” nia dehan.
Tanba, tuir nia, atu garante eleisaun ne’e la’o ho justu ne’e tenke presiza tempu atu halo sensibilizasaun ba lei, preparasaun no formasaun ba tékniku sira, nune’e garante taxa partisipasaun ne’ebé aas no kualidade ba ema hotu-hotu nia espetativa.
“Tanba ne’e mak ami hanoin katak tempu importante no liga ho ekipamentu eleisaun nian kuaze 100% hosi rai-liur, nune’e presiza iha preparasaun ba asuntu sira-ne’e,” nia esplika.
Lei númeru 6/2006, 28 dezembru, estabelese prinsípiu no norma balun ne’ebé mak regula prosesu eleisaun ba deputadu sira iha Parlamentu Nasional.
Maske nune’e, liu tiha dékada ida hafoin Lei Númeru 6/2006, 28 dezembru, ne’e tama em vigor, haree katak presiza halo alterasaun kiik-oan balun atu nune’e husi parte ida asegura nafatin armonizasaun ho lei hotu ne’ebé mak vigora hela iha ordenamentu jurídiku Repúblika Demokrátika Timor-Leste nian.
Iha parte seluk, lei ne’e mós bele akompaña nafatin, la’ós de’it evolusaun teknolójika maibé mós dezafiu sira-ne’ebé mak sei hasoru iha prosesu eleitorál demokrátiku.
Atu konkretiza ida-ne’e, sei introdús alterasaun balun ba Lei númeru 6/2006, 28 dezembru, ho nune’e bele promove armonizasaun lejislativa no koezaun iha ordenamentu jurídiku no Administrativa Teritóriu nian.
Jornalista : Osoria Marques
Editór : Cancio Ximenes
