Ta’a ai-parapa iha Hera, MAP halo ona investigasaun

DILI, 17 janeiru 2023 (TATOLI)—Ministériu Agrikultura no Peska (MAP), liuhosi Diresaun Nasional Konservasaun Floresta no Dezenvolvimentu Ekoturizmu, dadaun ne’e  halo hela investigasaun ba ema ta’a ai-parapa arbiru  iha Hera.

“Relasiona akontesimentu horiseik iha Hera, ema deskonesidu ta’a ka estraga ai-parapa, ita-nia ekipa daudaun ne’e halo hela investigasaun, atu hatene nia motivu,”Diretór Nasionál Konservasaun Floresta no Dezenvolvimentu Ekoturizmu, Fernando Araujo hateten  ba Agência Tatoli, iha nia knaar-fatin, Caicoli, Dili, tersa ne’e.

Nia dehan, ai-parapa ne’e rasik nu’udar ai protejidu ida maibé ema kontinua estraga, ida ne’e hatudu katak menús konsiénsia ema nian.

“Ita-nia investigasaun la’o hela, ne’ebé bainhira investigasaun ne’e hotu mak ita hatene nia motivu. Ne’ebé sansaun ba ida ne’e Ministériu Públiku mak sei foti tuir lei ne’ebé iha, maibé ita sei hein investigasaun, buat ne’ebé ha’u husu ba públiku mak labele estraga ita-nia ai-horis protejidu sira liuliu ai-parapa tanba ai ne’e rasik ekosistema ne’ebé importante liu ba rai no tasi,” nia dehan.

Jornalista : Arminda Fonseca

Editora :  Armandina Moniz