2022, MAP rekolla reseita hosi produtu floresta hamutuk rihun $134
DILI, 18 janeiru 2023 (TATOLI)— Ministériu Agrikultura no Peska (MAP), liuhosi Diresaun Nasional Dezenvolvimentu Floresta Komunitária no Departamentu Produsaun no Utilizasaun Produtu Florestál, iha tinan 2022 rekolla reseita hosi produtu floresta hamutuk $134.925,94 (rihun $134).
Xefe Departamentu Produsaun no Utilizasaun Produtu Florestál, Pascoal Barros do Carmo, hateten, reseita ne’ebé, rekolla mai hosi atividade hanesan, atendimentu lisensa tula ai-teka metan no mutin, lisensa tula ai-sunu, no ai-sunu ne’ebé guarda floresta prenda, no reseita maihosi mós lisensa exportasaun ai-teka ba nasaun seluk, no reseita hosi seluk tan.
“Janeiru to’o dezembru 2022, ita-nia parte rekolla reseita $134.925,94 ba kofre estadu,” Pascoal Barros do Carmo, hateten ba Tatoli iha nia knaar-fatin, Caicoli, Dili, kuarta ne’e.
Nia dehan, atividade ne’ebé sira halo hanesan, rekolla reseita hosi produtu floresta ba lisensa tula no lisensa tesi bazeia ba despaixu Ministru Agrikultura no Peska númeru 10/2011, no depaixu hosi liña jerál floresta nian númeru 70/2020, ho baze legál sira hosi atividade halo atendimentu ba komunidade.
“Lisensa tipu ai ne’ebé ami fó ba komunidade bele tesi mak ai sira ne’ebé komunidade rasik mak kuda hanesan, ai-keta metan, mutin no ai-mahoni, no ita bandu komunidade tesi ai sira ne’ebé moris ho natural hanesan ai-kiar, fukira, ai-bubur, ai-kameli no seluk tan,” nia dehan.
Nia dehan, reseita ne’ebé sira rekolla hosi produtu floresta liuhosi komunidade selu lisensa tula ai nian ba iha MAP ne’e bazeai ba métru kúbiku, hanesan ai-teka metan métru kúbiku ida $25, ai-teka mutin no ai-mahoni métru kúbiku ida $15.
“Reseita ne’ebé Departamentu Produsaun no Utilizasaun Produtu Florestál rekola hahú hosi 2019 to’o 2022 ne’e hamutuk $423.357,79,” Pascoal isplika.
Jornalista : Arminda Fonseca
Editora : Armandina Moniz
