BOBONARO, 19 janeiru 2023 (TATOLI) – Ministériu Agrikultura no Peska (MAP) liuhosi diresaun nasionál irrigasaun, kuarta ne’e hahú normaliza kanál irrigasaun tradisionál Mabil-Gol, iha suku Tapo-Memo, postu administrativu Maliana, munisípiu Bobonaro ne’ebé hetan estragu hosi inundasaun hafoin akontese udan-boot iha 2022.
Ofisiál Irrigasaun Servisu Agrikultura Munisípiu Bobonaro, Celestino Henriques, esplika normalizasaun ne’e bazea ba pedidu hodi agrikultór sira tanba kondisaun irrigasaun refere kuaze atu atu totál.
Notísia relevante: Agrikultór suku rua iha Maliana ezije MAP normaliza irrigasaun Mabil-Gol
“Ita halo atendimentu ne’e emerjénsia, tanba fatin tolu maka kotu, atende hotu tolu ne’e tiha maka foin ba iha kanu-matan ne’ebá tuir kalkulasaun ne’e ami tenke serbisu semana ida tomak,” nia informa ba jornalista sira, iha natar parte ba suku Tapo-Memo, kuarta ne’e.
Celestino subliña, tuir kalkulasaun ekipamentu pezadu sei halo normalizasaun to’o semana ida, tanba volume serbisu boot.
“Ita labele dehan loron ida ka rua bele hotu, karik la hotu ita-nia komunidade sira ezije nafatin atu halo buat ne’e bele kompletu. Sé semana ida la hotu, kondisaun kampu sei presiza, entaun mákina sei mantein nafatin, karik gazoel mak la to’o mós ami liga fali ba diresaun irrigasaun nasionál atubele apoia fila-fali,” nia hatutan.
Responsável Irrigasaun Munisípiu Bobonaro ne’e husu ba agrikultor suku rua komposta hosi Tapo-Memo no Saburai atu pasiénsia hein to’o serbisu remata.
“Agora ita atende ona, ha’u husu deskulpa maske tarde, karik bee tama lalika husik ita-nia rai abandona, ita mós tenke esforsu kuda netik buat ruma iha ita-nia rai ne’e, labele mamuk,” Celestino apela.
Xefe suku Tapo-Memo, postu administrativu Maliana, munisípiu Bobonaro, Joaquim Baptista dos Santos, agradese ba Ministériu Agrikultura no Peska tanba bele responde ona sira-nia pedidu maski hein kleur.
“Sé karik mákina ne’e la mai, populasaun ne’ebé uza bee irrigasaun Maliana II ne’e sei la halo natar iha époka tinan ida-ne’e, maibé agora mákina to’o mai hadi’a ona, ami agradese ba VIII Governu Konstitusionál,” nia katak.
Xefe suku Juaquim haklaken, bainhira mákina halo hela normalizasaun maka iha individu ka grupu ruma lakohi koopera hodi oferese rai pedasuk ruma maka autoridade lokál sei foti medida ruma tuir kompeténsia ne’ebé iha.
Enkuantu planu serbisu ekipamentu pezadu iha terrenu maka irrigasaun Mabil-Gol, Ai-phe, Ual-Gol ne’ebé kotu totál. Hafoin ida-ne’e sei kontinua ba hasai Tahu-Nurak iha Itek Irrigasaun Maliana II atubele fornese bee ba natar hosi suku Saburai no Tapo-Memo.
Notísia relevante: MAP sei normaliza irrigasaun tradisionál Mabil-Gol
Jornalista : Sérgio da Cruz
Editór : Evaristo Soares Martins
