VIQUEQUE, 20 janeiru 2023 (TATOLI)— Governu liuhosi Ministru Administrasaun Estatál (MAE), Miguel Pereira de Carvalho, ne’ebé akompaña ho autoridade munisipál, sesta ne’e, hala’o inaugurasaun ba jardín 1959 iha kapitál munisípiu Viqueque.
Biban ne’e, Ministru Miquel Pereira de Carvalho agradese ba autoridade munisípiu Viqueque konsege finaliza konstrusaun jardín istóriku 1959, iha postu adiministrativu Viqueque-Vila, munisípiu Viqueque.
“Ha’u agradese ba autoridade munisípiu Viqueque ne’ebé konsege ezekuta orsamentu ne’ebé Governu aloka ba munisípiu Viqueque, hodi konstrui jardín istóriku 1959 ne’ebé lokaliza iha postu adiministrativu Viqueque”, Ministru ne’e hateten liuhusi diskursu iha inagurasaun jardín 1959, postu Viqueque vila, munisípiu Viqueque.
Reabilitasaun ba jardín 1959 munisípiu Viqueque hetan aloka orsamentu ho montante $273.301,49. Enkuantu reabilita jardín ne’e responsavél husi empreza Paecefull Uni.Lda hahú 15 setembru 2021 no konsege moru haleu jardín, iha mós fasilidade hanesan uma haat ba vizitór, lampu, fatin labarik sira hodi halimar.
Projetu reabilitasaun jardín 1959, liuhosi Diresaun Planu Integradu Munisipál (PDIM) maka halo kontrolu no avaliasaun ba projetu.
Iha biban hanesan, Adiministradór Munisípiu Viqueque, Januario Soares “Bolly”, haktuir, konstrusaun jardín foin dahuluk akontese iha munisípiu Viqueque, maibé prosesu konstrusaun inisíu la’o ho di’ak, nune’e munisípiu Viqueque iha ona kapasidade hodi jere kompetésia sira ne’e.
“Maske. konstrusaun sira ne’e ha’u haree buat balun seidauk kompleta, maibé hanoin ba oin ita bele kompleta liuliu área tékniku sira hanesan instalasaun eletrisidade, Maibé ita inaugura ona jardín ida-ne’e ba oin ita presiza tau mós ema jardineru no husu apoiu seguransa sivíl hodi tau matan ba jardín atu ema labele estraga fasilidade sira iha jardín laran”, nia promotenia akresenta.
Autoridade Munisipál sei entrega Jardín 1959 ba Diresaun Jestaun Merkadu no Turizmu atu halo jestaun no manutensaun inklui konservasaun.
Alende ne’e, nia husu ba komunidade no joven sira tau matan no labele estraga fasilidade sira ne’ebé maka iha jardín laran tanba jardín ne’e kria hodi ema uza halo reflesaun.
Entretantu, Diretór PDIM munisípiu Viqueque, Domingos Monteiro de Carvalho, informa preparasaun ba konstrusaun jardín 1959 hahú iha tinan 2020, implementa iha tinan 2021 no kona-ba dezeñu enjenária munisípiu Viqueque maka kria rasik.
“Ita nia enjeneiru na’in-tolu mak halo dezeñu no konsege konstrui too finaliza”, nia afirma.
Seremónia inagurasaun jardín 1959 partisipa mós komadante Polísia Nasionál Timor Leste (PNTL) munisípiu Viqueque no komunidade sira.
Jornalista: Vitorino Lopes da Costa
Editór : Florencio Miranda Ximenes
