Autoridade RAEOA lansa distibuisaun mobiliáriu ba eskola foun 21
OÉ-CUSSE, 21 janeiru 2023 (TATOLI)–Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hamutuk ho Sekretária Rejionál ba Asuntu Edukasaun Solidariedade Sosiál, Avelina da Costa, sesta ne’e, lansa distribuisaun mobiliáriu (meza no kedeira) ba eskola foun 21 ne’ebé harii iha 2021-2022.
Prezidente Autoridade RAEOA, Arsénio Paixão Bano, husu profesór sira atu kuidadu mobiliáriu hirak ne’ebé autoridade distribui ona hodi bele kompleta fasilidade eskola sira, atu fasilita di’ak liután estudante sira iha prosesu ensinu aprendizajen.
“Oé-Cusse atu halo mudansa ba rai presiza forma oan sira hosi ensinu báziku to’o sekundáriu ho di’ak, atu bele garante kualidade edukasaun no kualidade lideransa futuru Oé-Cusse nian. Rai ne’e atu halo mudansa profesór sira tenke servisu makaas, tanba laiha buat ida atu fó gratuita maibé presiza ema hotu nia kontribuisaun no esforsu tomak. Entaun, ha’u husu profesór sira hadomi ita-nia fasilidade sira-ne’ebé Estadu entrega,” Arsénio Paixão Bano hateten iha iha serimónia lansamentu distribuisaun mobiliáriu ba eskola 21 iha EBF Noafafo Oé-Cusse.
Sekretária Rejionál ba Asuntu Edukasaun Solidariedade Sosiál, Abelina da Costa, hateten mobiliáriu hirak-ne’e prioridade ba eskola hamutuk 21 kompostu hosi pré-eskolár, ensinu báziku, ensinu sekundáriu jerál tékniku vokasionál.
“2021 ne’e Oé-Cusse harii eskola foun hamutuk 14 no iha 2022 ne’e reabilita eskola neen (6). Tanba ne’e, iha tinan kotuk ita prevee orsamentu halo akizisaun fornese mobiliáriu ba eskola sira-ne’e, hodi kompleta fasilidade eskola sira liu-liu meza no kadeira,” nia informa
Númeru distribuisaun mobiliáriu hirak-ne’e ba estudante pré-eskolár unidade 360, ba profesór unidade 200 no ba estudante 180, distribuisaun ba ensinu sekundária tékniku vokasionál hamutuk unidade 2.025, ba ensinu báziku ho sentrál no filiál sira kompleta ho kuadru (black Board) iha unidade 12 no mós armáriu arkivu unidade 15.
Koordenadór eskola bázika Filiál (EBF) Noafafo, Filomena Afoan, agradese ba Autoridade RAEOA liuhosi Sekretáriu Edukasaun no Solidariedade Sosiál tanba oferese ona apoiu, atu garante kondisaun no situasaun iha prosesu aprendizajen.
“Ami agradese tanba durante ne’e eskola barak mak falta meza no kadeira liu-liu eskola sira-ne’ebé harii iha tinan kotuk. Ha’u hanoin ida-ne’e tulun tebes ami hanesan profesór atu hanorin oan sira iha kondisaun di’ak atu tuur iha kadeira no hakerek iha meza hodi simu matéria loro-loron nian iha eskola,” nia dehan.
Entretantu, fornesedór ba mobiliáriu hirak ne’e hosi empreza Vitorlay Unipesoál Lda ho valór kontratu hamutuk $249,890.96 ne’ebé Autoridade RAEOA prevee iha Orsamentu Jerál Estadu (OJE) 2022.
Jornalista : Abílio Elo Nini
Editor : Cancio Ximenes
