Cidália Nobre Guterres: “Eroina timoroan mak sai ha’u-nia inspiradora”

DILI, 24 janeiru 2023 (TATOLI)–Espoza eis Prezidente Repúblika Francisco Guterres Lú Olo, Cidália Lopes Mouzinho Guterres, hateten eroina timoroan hotu mak sai inspiradora ba nia no ba feto timoroan sira hotu.
Notísia Relevante: Valór ba oan sira mak nafatin kuda domin no morál
“Eroina sira-ne’e hotu mak sai ha’u-nia inspiradora. Ha’u respeita nafatin ba ita-nia eroina sira no ba maluk timoroan barak ba mate ba rai ida-ne’e, ne’ebé iha tempu ne’ebá tau aas nafatin. Tanba sira-nia luta mak inspira ita katak sira halo ona sakrifisiu ne’ebé mak todan maibé ba agora ne’e ita kontinua de’it saida mak sira kontribui ona,” Espoza eis PR ne’e hateten ba Agência Tatoli liuhosi programa Entrevista Eskluziva ho tema Papél Feto iha Sosiedade no Nasaun iha studio Faról, tersa ne’e.
Tanba, nia dehan, eroina no lutadór sira hotu iha Timor-Leste nia sakrifisiu mak bele inspira timoroan hodi kontinua luta ba dezenvolvimentu nasionál tanba luta ba ukun rasik-an ne’e ema hotu tantu feto no mane nia sakrifisiu.
“Ita-nia maluk FALINTIL ne’e la’ós mane de’it maibé iha feto hotu. Entaun, hosi ne’e inspira ita katak sira bele sakrifika no fó sira-nia an mak foin luta hodi ba misaun sagrada ida, entaun ba sira ha’u respeita sira no sira mak sai inspiradór ba ha’u,” nia dehan.
Ohin loron timoroan sira la presiza lakon nia moris ka mate maibé presiza de’it atu asegura katak timoroan liu hosi kna’ar oioin ne’ebé timoroan iha mak tenke hala’o knaar ho loloos, hodi kontribui atu bele dezenvolve di’ak liután nasaun Timor-Leste.
Nune’e, nia enkoraja timoroan sira katak tempu agora ne’e atu aprernde hodi aumenta matenek hodi kontribui ba dezenvolvimentu no evita halo violénsia, tanba nasaun presiza ema matenek no futuru nasaun nian iha joven sira-nia liman.
Jornalista : Osória Marques
Editór : Cancio Ximenes

