Valór ba oan sira mak nafatin kuda domin no morál

DILI, 24 janeiru 2023 (TATOLI)–Espoza eis Prezidente Repúblika Francisco Guterres Lú Olo, Cidália Lopes Mouzinho, hateten valór ba oan sira mak nafatin kuda domin no morál ba labarik feto no mane iha família no sosiedade nia leet.
Notísia Relevante: Feto presiza kapasita-an tanba papél feto importante iha sosiedade-nasaun
“Valór ba oan sira mak kuda nafatin valór domin morál ba oan sira, iha esperiénsia hodi eduka labarik mane ho feto iha família no soseidade nia leet. Tanba hanoin katak ita inan mak iha hanoin luan hodi halo direfensa nesesidade labarik feto no mane nian. Maibé ha’u hanoin laiha diferensa tanba ha’u-nia oan sira ne’e sempre rona hosi ha’u, rona hosi liur entaun mai soke malu ona. Ida-ne’e ba ha’u ne’e importante hotu maibé presiza konversa entre família uma laran. Maibé ha’u-nia oan na’in-tolu sempre konversa ho ha’u no sira hakarak besik liu ha’u duke nia aman,” Espoza eis PR ne’e hateten ba Agência Tatoli liuhosi programa Entrevista Eskluziva ho tema Papél Feto iha Sosiedade no Nasaun iha studio Faról, tersa ne’e,
Maibé, nia dehan, labarik feto sempre iha kuriozidade aas atu husu hela pergunta liga ho asuntu feto nian, maibé inan mak tenke pasiénsia no vontade no matenek hodi hanorin ba oan sira.
“Ba asuntu ne’e ita la’ós hanorin de’it maibé ita foti esperiénsia ne’ebé mak akontese iha sosiedade. Purezemplu la eskola ho di’ak ka la akaba eskola, ransu malu no sai inan ne’ebé mak ho idade kiik, isin rua sedu no hadaet moras oioin no labale hanoin estraga sira-nia vida,” nia dehan.
Ida-ne’e akontese tanba liga ho teknolojia avansadu, tanba buat hotu sei avansadu hotu tanba bele dada buat hotu lori mai iha kuartu laran.
“Entaun ha’u sempre dehan ba sira, bele apreende buat hotu maibé atu aplika ka halo mak labele. Buat ne’ebé bele mak bele maibé liga ho estudu nian. Ha’u sempre ko’alia beibeik iha eskola sira katak iha teknolojia avansadu, ne’e tanba buat ne’ebé mak lahetan iha ita-nia estudu, ita sei hetan hosi teknolojia. Ida-ne’e di’ak tanba bele ajuda, ha’u bele dehan teknolojia ne’e matan rua mak ida pozitivu no seluk negativu, agora ita mak hatene uza ba ita-nia nesesidade,” nia hateten.
Nia triste liu tanba sosiedade uza sala teknolojia hodi halo buat oioin, entaun hanesan Embaixadora ba Plan Internasionál iha Timor-Leste ne’ebé mak ko’alia asuntu feto, labarik feto. Fo hanoin katak teklonolojia avansadu ne’e atu aumenta koñesimentu.
“Maibé papel feto hanesan inan importante hodi tau matan no labele dukur liu, nune’e labarik sira labele sai vítima ba teknolojia ne’e rasik,” nia dehan.
Jornalista : Osória Marques
Editór : Cancio Ximenes

