iklan

DILI

Feto presiza kapasita-an tanba papél feto importante iha sosiedade-nasaun

Feto presiza kapasita-an tanba papél feto importante iha sosiedade-nasaun

Intervista Eskluzivu Rita Almeida ho Espoza Prezidente Repúblika Demokrátika Timor-Leste (RDTL), Cidalia Lopes Nobre Mauzinho Guterres, iha estudiu Tatoli,I.P, tersa (24/01). Imajen/ TATOLI

DILI, 24 janeiru 2023 (TATOLI)–Espoza eis Prezidente Republika Francisco Guterres Lú Olo, Cidália Lopes Mouzinho Guterres, hateten feto nia papél importante iha sosiedade no nasaun Timor-Leste, nune’e husu feto sira presiza kapasita-an hodi bele partisipa iha dezenvolvimentu nasionál.

Notísia Relevante: Feto envolve iha polítika bele kontribui muda sosiedade nia moris di’ak

“Ukun-an liu tinan 20 ona maib’e feto nia partipasaun seidauk barak, nune’e feto presiza kapasita-an hodi bele partisipa másimu iha dezenvolvimentu nasionál tanba papel feto nian importante tebes iha sosiedade no nasaun ida-ne’e,” Espoza eis Prezidente Repúblika ne’e hateten ba Agência Tatoli liuhosi programa Entrevista Ezkluziva ho tema “Papél Feto iha Sosiedade no Nasaun” iha studio Faról, tersa ne’e.

Tanba ne’e, nia husu ba feto sira-ne’ebé envolve an vida polítika tenke kapasita-an, nune’e kna’ar partidu polítiku, Estadu, Governu inklui sosiedade sívil sira mak nafatin fó formasaun no fó apurtunidade ba feto sira hodi partisipa ho másimu.

“Nune’e presiza duni aumenta koñesimentu ho kualidade no kuantidade ba partisipasaun feto nian iha vida polítika. Importante mak feto presiza kapasita-an nafatin no hasa’e nafatin ita-nia koñesimentu. Keta baruk no kolen atu aprende, tantu ba joven feto no mane sira iha Timor-Leste, atu nune’e ita bele partisipa ho di’ak bainhira responsabilidade to’o iha ita-nia liman,” nia dehan.

Tuir nia, Timor-Leste iha ona lei kuota 40% ba feto maibé bainhira feto ema fó fiar asume kargu importante ruma ba labele sai komplementa de’it maib’e tenke hanoin katak feto Timor-Leste mós bele.

“Feto tenke kompleta duni no ita feto Timor mós bele, tanba ne’e feto tenke partispa. Se feto la partisipa entaun oinsá mak ita bele kontribui ba ita-nia nasaun. Tanba ne’e mak husu ba mane maluk sira atu fó suporta, tanba feto no mane hamutuk mak hodi bele deside maibé labele taka dalan ba malu,” nia dehan.

Ho nune’e, nia apresia nafatin feto maluk ne’ebé mak halo kna’ar ona iha Governu, Estadu no organizasaun sira-ne’ebé mak ko’alia kona-ba asuntu feto no entidade kompetente sira iha Timor-Leste.

Nune’e, nia husu ba mane sira atu kontinua fó apoiu ba parseira, feto maluk no sira-nia kaben sira hodi bele involve-an iha vida polítika, nune’e bainhira susesu sei la sees hosi kontribuisaun morál no apoiu hosi mane sira.

Ba joven mane no feto sira, nia ekoraja katak tempu agora ne’e atu apreende hodi aumenta matenek hodi kontribui ba dezenvolvimentu no evita hosi violénsia, tanba nasaun presiza ema matenek no futuru iha joven nia liman.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!