iklan

EDUKASAUN

TLCE rekomenda Governu hasa’e ambisaun kuríkulu iha nivel edukasaun

TLCE rekomenda Governu hasa’e ambisaun kuríkulu iha nivel edukasaun

Koordenadór Timor-Leste Coalition for Education (TLCE), José Monteiro

DILI, 24 janieru 2023 (TATOLI)—Timor-Leste Coalition For Education (TLCE, sigla inlgés), rekomenda ba Governu liuliu Ministériu Edukasaun Juventude no Desportu (MEJD) atu hasa’e ambisaun iha kuríkulu nivel edukasaun nian iha Timor-Leste.

Koordenadór TLCE, José Monteiro, hateten atu hasa’e ambisaun iha  kúrikulu nivel edukasaun no halo avaliasaun mak estudante iha nivel ensinu báziku, ezemplu iha klase III tenke hatene ona lee. Tanba, estudante ida tenke hatene lai mak pasa ba klase. Labele foin hatene letra musan ida ka rua profesór sira fo ona pasa klase no ida ne’e sai dezafiu boot.

Nia dehan, Governu presiza hasa’e ambisaun kuríkulu iha edukasaun tanba haree ba kualidade edukasaun iha Timor-Leste nian dezafiu mak estudante sira remata lalais kontinua ba eskola iha universidade maibé laiha bukae ne’ebé natón ba estudante sira hodi kontinua iha nivél universitáriu.

“Ha’u-nia rekomendasaun mak hasa’e lai ambisaun hosi kuríkulu edukasaun kada nivel nian ne’e, no hasa’e nivel difikuldade avaliasaun nian atu nune’e estudante sira atu tama eskola obriga sira tenke estuda. Tanba dezafiu boot ba kualidade edukasaun ne’e mak avaliasaun ne’ebé mak iha fasil, ka avaliasaun sumativa no normativa ne’ebé mak fasil, no  obriga estudante sira tama universidade maibé ita lafó bukae natón atu sira tama universidade,” José Monteiro dehan ba Agência Tatoli, iha nia knaar-fatin, Caicoli, Dili, tersa ne’e.

Ho ida ne’e, nia dehan  presiza hasa’e ambisaun kuríkulu iha nivel edukasaun tanba iha ambisaun nivel edukasaun ne’e avaliasaun somativa ho normativa ne’e fasil, entaun estudante ne’e remata lalais kontinua ba nivel seluk, maibé ninia kapasidade, loloos seidauk to’o iha nivel ne’ebá.

Nia dehan, bainhira la hasa’e ambisaun kuríkulu ida ne’e dezafiu boot ba estudante sira atu estuda lorloron, tanba bareira ne’ebé Governu monta fasil ba sira atu ultrapasa.

“Tanba ita haree estudante hatene ka la hatene  haree nia lee oituan bele ona fó pasa de’it, entaun ida ne’e sai dezafiu. Ita atu halo mudansa tenke presiza halo difisil oituan ba avaliasaun no aumenta ambisaun iha kuríkulu nian,” nia dehan.

Nia dehan, TLCE nia advokasia ba kualidade edukasaun iha Timor-Leste mak buka dadus, monitoriza atividade MEJD nian no entrega ba Ministériu Edukasaun mak foti desizaun, tuir rekomendasaun ne’ebé TLCE fó.

“Ami monitorizasaun ne’e haree ba atividade MEJD nian. Ita haree nia lacuna sira iha ne’ebé ami foti no rekomenda ba sira atu sira hadi’a, ne’ebé ita-nia rekomendasaun sira hanesan hasa’e ambisaun kuríkulu, merenda escolar no seluk,” nia hateten.

Jornalista : Arminda Fonseca

Editora       : Armandina Moniz

iklan
iklan

Leave a Reply

iklan
error: Content is protected !!