DILI, 27 janeiru 2023 (TATOLI)— Funsionáriu Arquivo Museu Resisténcia Timorense (AMRT), Januario Pinto Soares, hateten iha tinan 2022 ne’e AMRTkonsege rejista ona vizitante nasionál no internasionál hamutuk na’in-8.000.
Notísia Relevante: Turista sira vizita AMRT atu hatene Timor-Leste nia istória funu
“Ami rejistu vizitante ida-ida hamutuk ema nain-3.973 no bainaka ho grupu rai-laran no rai-li’ur hamutuk nain-3.678. Ami fó asesu livre ba labarik sira ba muzeu atu aprende istória luta ba independénsia Timor nian,” Funsionáriu AMRT, Januario Pinto Soares, hateten ba Agência Tatoli iha AMRT, Colmera, sesta ne’e.
Nia dehan, vizitante nasionál ka domestika ne’e mak estudante husi eskola sira iha Dili laran no munisípiu balun nomos vizitante ofisiál sira husi ministériu sira.
Ba vizitante internasionál ne’e dala barak sira mai hosi Austrália, Estadu Unidu Amérika, Xina, España, Japaun, Portugál, no snasaun ira seluk tan.
“Ita-nia vizitante maiória internasionál mai hosi Austrália. Númeru vizitante ne’ebé aas liu iha tinan 2022 kompara ho tinan 2021 ne’ebé ema besik 500 mak ita rejista,” nia dehan.
Muzeu aloka kustu entrada sentavu 25 ba estudante sira ho idade tinan 17 ba leten, sentavu 50 ba individuál no $1 ba ema adultu, vizitante individuál no $15 ba vizitante grupu Nasionál no internasionál ida-idak.
AMRT harii iha tinan 2005 atu prezerva memória no patrimóniu istóriku Nasionál no atu disemina valór sira hosi povu Timor-Leste nia luta rezisténsia.
Jornalista : Osoria Marques
Editór : Cancio Ximenes