DILI, 04 fevereiru 2023 (TATOLI)—Prezidente Konsellu Kombatente Libertasaun Nasionál (CCLN), Vidal de Jesus “Riak Leman”, hateten reabilitasaun ba edifísiu CCLN falta 30% atu finaliza tanba agora daudaun hela atu pinta de’it.
“Hela 30% atu ita finaliza ona tanba hela pinta de’it ona. Reabilitasaun ne’e Ministériu Asuntu Kombatente Libertasaun Nasionál mak kontrata Kompañia hodi reabilita maibé ida-ne’e ba uma rua de’it, inklui ho uma Konsellu fundu kontributivu nian hodi rai osan nian ka banku veteranu. Uma ho salaun boot ne’e CCLN kontrata Kompañia BTK mak reabilita no salaun ne’e ita uza osan rihun $100,” Prezidente Konsellu Kombatente Libertasaun Nasionál (CCLN) hateten ab Agência Tatoli liuhosi telfónika, sábadu ne’e.
Nia dehan, osan restante ne’e CCLN hamutuk Ministériu Asuntu Kombatente Libertasaun Nasionál mak kontrata Kompañia (MAKLN) hodi halo kondekorasaun ba veteranu sira iha tinan kotuk.
“Osan ne’ebé aloka ba reabilitasaun ba edifísiu ne’e ita uza fali osan ba komemorasaun loron 3 marsu tinan 2022 nian ho montante $250.000 mak hodi uza. Tanba, tinan kotuk ita la konsege realiza selebrasaun, maibé hosi osan ne’e mós ita uza ba halo kondekorasaun veteranu sira,” nia esplika.
Jornalista : Osoria Marques
Editór : Cancio Ximenes
