PNTL fó formasaun ba membru guarda floresta foun hamutuk 47
DILI, 06 fevereiru 2023 (TATOLI)—Polísia Nasional Timor-Leste (PNTL) liuhosi Sentru Formasaun Polísia (CFP, sigla portugés), segunda ne’e, fasilita formasaun ba membru guarda floresta foun hamutuk 47.
Komandante CFP, Superintendente Xefe Polísia, Arquimino Ramos, hateten, formasaun ne’ebé PNTL fó ba membru guarda floresta ne’e hanesan kursu báziku ida, no oinsá prepara membru foun sira ne’e, bele proteje an hosi risku sira.
“Formasaun ne’e ita mak fó kona-ba koñesimentu báziku seguransa nian, sira sei aprende matéria kona-ba sidadania, patriotizmu, nasionalizmu no profisionalidade hodi fo segurasa ba floresta iha área protejida no balada protezida sira, atu ema labele estraga,” Arquimino Ramos, hateten ba jornalista sira iha CFP, Comoro, Dili, segunda ne’e.
Nia dehan, formasaun ne’ebé ohin halo abertura ne’e, sei hala’o durante semana rua iha Rai-Robo, postu administrativu Atabae, munisípiu Bobonaro.
“Formasaun ohin ne’e, kontinuasaun hosi turmu tolu ne’ebé halo liu tiha ona. Atividade ne’e la’o tanba ita iha kooperasaun di’ak ho Ministériu Agrikultura no Peska (MAP) liuhosi Diresaun Floresta,” nia dehan.
Iha biban ne’e, Komandante Arquimino, husu ba membru foun guarda floresta ne’ebé durante semana rua tuir formasaun tenke kumpre regra ne’ebé iha.
“Ha’u husu ba membru foun sira ne’ebé tuir formasaun tenke kumpre regra ne’ebé iha tanba guarda floresta ne’e sira-nia papél importante ba nasaun oinsá hasees ita hosi ameasa dezastre naturál, no kuidadu rikusoin Timor nian ne’ebé iha,” nia dehan.
Membru guarda floresta na’in 47 ne’ebé partisipa formasaun báziku hosi PNTL ne’e, inklui mane 43 no feto na’in haat.
Antes ne’e, Ministériu Agrikultura no Peska liuhosi Diresaun Nasional Protesaun Konservasaun Floresta no Dezenvolvimentu Ekosistema iha tinan 2021, halo ona rekrutamentu ba membru guarda floresta hamutuk nain-50. Parte seluk, iha tinan 2022 rekruta tan 100. Ho nune’e total ho rekrutamentu antes iha guarda floresta hamutuk 200 iha nivel nasional.
Jornalista : Arminda Fonseca
Editora : Armandina Moniz
