2022, turista na’in 82 husu informasaun turizmu Timor-Leste nian iha CIT
DILI, 07 fevrereiru 2023 (TATOLI)—Ministériu Turizmu Komérsiu no Indústria (MTKI) liuhosi Sentru Informasaun Turístika (CIT, sigla portugés), iha tinan 2022 rejistu turista sira ne’ebé husu informasaun relasiona fatin turizmu nian iha Timor-Leste (TL) hamutuk 82.
“Iha tinan 2022, ita-nia parte rejistu ba turista ne’ebé mai husu informasaun kona-ba fatin istóriku sira no fatin turizmu nian no ita fasilita fó informasaun ne’e hamutuk 82,” Xefe Departamentu CIT, José Luis, hateten ba Agência Tatoli, iha nia-knaar fatin, Lecidere, tersa ne’e.
Nia dehan, turista sira ne’ebé CIT rejistu ne’e, mai husu informasaun, maibé kona-ba reseita sira-nia parte labele hatene tanba turista sira ne’e tama mai liuhosi Autoridade Aduaneiru (Alfándega) mak hatene.
Turista 82 ne’ebé CIT rejistu ne’e mai hosi nasaun sira hanesan, Austrália, Portugál, Kánada, Sri Lanka, Xina no seluk tan.
“Kona-ba turista sira ne’ebé mai ho ró kruzeiru sira ne’e, Ajénsia mak hatene. Tanba sira mai kontratu ho ajénsia sira, maibé tuir informasaun ne’ebe ami hatene iha tinan 2022 turista ne’ebé mai ho ró kruzeiru Le Lapérouse Austrália iha turista hamutuk 125 ida ne’e la inklui ema sira ne’ebé servisu iha ró laran. Nune’e mos iha tinan ida ne’e foin lalais simu tan ró Kruzeiru MS Paul Gauguin Austrália ho turista hamutuk 323 la inklui ho téknku iha ró laran,” nia dehan.
Nia dehan, vizita hosi turista sira ne’e importante tebes ba Timor-Leste tanba sira bele mai vizita Timor-Leste hodi haree fatin istóriku sira no hatene istória Timór nian.
Jornalista : Arminda Fonseca
Editora : Armandina Moniz
