DILI, 08 fevereiru 2023 (TATOLI)-Ministériu Justisa (MJ) liuhosi Diresaun Jerál Terras no Propriedade no kadastral, tersa ne’e, simbolikamente entrega sertifikadu atribuisaun rai nian ba Eletrisidade Timor-Leste, Empreza Públika (EDTL,E.P), hodi harii planta Enerjia Solar 72MW iha munisípiu Manatuto.
Komisáriu Ezekutivu Servisu Korporativu EDTL,E.P, Humberto Pereira Humberto Pereira, hateten atribuisaun própriu rai bá EDTL, bazeia ba dekretu lei númeru 14/2018, ne’ebé publika fali iha 17 agostu haktuir dekretu lei númeru 10/2020 iha 19 junu, iha munisipíu Manatuto hodi harii planta Enerjia Solar 72MW.
Humberto mos hato’o agradese bá Ministériu Justisa ba esforsu hotu ne’ebé halo.
” Ho atribuisaun sertifikadu rai nian ne’ebé MJ entrega ba EDTL,E.P, ami kompromete sei utiliza rai ne’e tuir mapa ne’ebé mak terras propriedade fó ona ba ami,” Humberto Pereira hateten, liuhosi nota komunikadu ne’ebé Agência asesu kuarta ne’e.
Biban ne’e, Diretora Kadastral, Zenoveva Correia, mós husu bá EDTL,E.P. atu halo tuir mapa ne’ebé Terras no Propriedade entrega ona ne’e, no assegura baliza iha rai refere hodi nune’e iha futuru labele mosu problema ba baliza rai nian.
Sertifikadu atribuisaun rai nian ne’ebé MJ entrega ba EDTL,E.P atu harii Enerjia Solar 72MW ne’e iha aldeia Uma Rentau, suku Lifau, postu administrativu, Laleia, munisípiu Manatuto no rai refere ho medida 350 ektare.
Serimonia atribuisaun sertifikadu rai hosi Ministériu Justisa liuhosi Diresaun Jerál Terras no Propriedade no kadastral ne’e simu direitamente hosi Komisáriu Ezekutivu Servisu Korporativu EDTL,E.P, Humberto Pereira akompana hosi Sekretária Ezekutiva EDTL,E.P, Hermínia Marçal da Costa, iha edifísiu Ministériu Justisa, Colmera-Dili.
Jornalista : Arminda Fonseca
Editora : Armandina Moniz
