iklan

EKONOMIA

MTKI ho Embaixada Portugál halo kooperasaun dezenvolve pouzada sira iha TL

MTKI ho Embaixada Portugál halo kooperasaun dezenvolve pouzada sira iha TL

Asesór Espesialista Turizmu Komunitáriu iha MTKI, Manuel Vong. Imajen Tatoli/Egas Cristóvão

DILI, 09 fevereiru 2023 (TATOLI)— Governu liuhosi Ministériu Turizmu Komérsiu no Indústria (MTKI), halo ona diskusaun faze dahuluk ho Embaixada Portugál iha Timor-Leste ba planu atu dezenvolve pouzada sira iha Timor-Leste (TL).

Asesór Espesialista Turizmu, Manuel Vong, hateten, parte MTKI halo ona sorumutu ho Embaixada Portugál iha TL. Sorumutu  ne’e, atu hametin kooperasaun TL ho Portugál liuhosi protokolu kooperasaun, entre MTKI ho Ministériu Ekonómia Portugeza nian.

“Maibé asuntu ida ne’e ita foin hahú diskusaun atu iha kooperasaun ida entre TL no Portugál, hodi bele prezerva patrimóniu istóriku arkitektóniku ne’ebé mak ligadu ho Portugeza sira ninia liman rohan, ne’ebé husik hela iha TL,” Manuel Vong hateten ba Agência Tatoli, iha nia-knaar fatin, Farol Dili, kinta ne’e.

Nia dehan, presiza halo prezervasaun ka manutensaun ba pouzada sira ne’e. Tanba, patrimóniu sira ne’e dala-barak iha istória maibé ema barak la hatene.

“Ita-nia patrimóniu sira ne’e iha valór istóriku hanesan kulturál no edukasaun. Ho ida ne’e, ita tenke presiza prezerva tanba ita la halo prezervasaun mak ikus mai nia bele lakon nia valór istoria sira,” Vong hateten.

Nia afirma, patrimóniu istóriku ne’ebé Governu Portugál hakarak atu rekopera filafali mak hanesan, Pouzada Baguia, Castelo Ossu, Rezidénsia Administradór Uatulari, Rezidénsia Administradór Laclubar, Rezidénsia Administradór Turiscai, Rezidénsia Administradór Same-Villa, Pousada Maubara,  Rezidénsia Administradór Pante Makassar, Pouzada Ataúro no Pouzada Manatuto Vila.

Liga ba turizmu fatin sira ne’e, hanesan ona turizmu istóriku no agora oinsá mak atu bele hadi’a hodi halo manutensaun, no prezervasaun, dezenvolvimentu ba fatin hirak ne’e hodi bele lori benifísiu ba ekonómiku Estadu, sosiál, kulturál no komunidade.

Nia dehan, daudaun ne’e, ekipa tékniku sira halo ona diskusaun hein katak bele hetan akordu hosi parte hotu  atu bele implementa.

“Tuir planu servisu nian ne’ebé iha ita prevee atu bele halo manutensaun iha tinan ida ne’e. Maibé, kona-ba nia orsamentu ita seidauk hatene tanba, foin faze diskusaun,” nia dehan.

 Jornalista : Arminda Fonseca

Editora     : Armandina Moniz

iklan
iklan

Leave a Reply

iklan
error: Content is protected !!