Governu presiza fó protesaun ba labarik no Ema ho Defisiénsia
DILI, 13 fevereiru 2023 (TATOLI)—Vise Ministra Solidariedade Sosiál no Inkluzaun (MSSI), Signi Chandrawati Verdial, presiza halo esforsu hotu-hotu hodi kontinua fó protesaun ba labarik no ba Ema ho Defisiênsia (EhD) sira iha Timor-Leste.
“Ita hotu hatene katak prosesu la fasil, ita iha hela prosesu konstrução do Estado, maibé ita presiza halo esforsu hotu-hotu hodi kontinua fó protesaun ba labarik ho Ema ho Defisiénsia, liu-liu sira ne’ebé mak vulneravél. Tan ne’e, ha’u fiar ho apoiu hosi Programa Dezenvolvimentu Polísia Timor Leste ka Timor (TLPDP-sigla inglés) ho apoiu hosi UNICEF, bele ajuda ita atu fó apoiu justisa ba labarik ho EhD iha Timor-Leste,” Vise MSSI hateten liuhosi nota imprensa ne’ebé Agência Tatoli asesu, segunda ne’e.
Vise Ministra ne’e enkoraja investigadór sira ba programa formasaun ne’e atu aproveita opurtunidade ida-ne’e ho didi’ak, tanba atu sai investigadór ba labarik, investigadór rasik presiza hatene labarik sira-nia kondisaun real.
“La fasil ita atu atende labarik sira-ne’ebé hasoru abuzu. Ha’u rasik asiste, kuandu iha problema balun ita tenke sai hanesan labarik sira-nia belun, ita tenke sai hanesan sira-nia inan-aman, ita mós tenke iha téknika oioin atu hetan informasaun loloos hosi labarik no EhD sira,” nia dehan.
Aleinde ne’e, nia dehan, kazu EhD ne’ebé lakon iha prosesu julgamentu tanba laiha tradutór lian jestuál, hodi halo vítima lakon iha prosesu julgamentu no kestaun ne’e governante lamenta ho situasaun tanba iha Tribunál laiha tradutór lian jestuál.
Tanba, tuir nia, iha kazu ida-rua ne’ebé vítima rasik ba ko’alia ho MSSI relasiona ho problema tradusaun, tanba iha kazu balun tama iha tribunál ne’e vítima la intende esplikasaun hosi juiz no juiz rasik defisil atu halo julgamentu, entaun vítima tenke lakon iha prosesu julgamentu.
Problema ida-ne’e nia parte hato’o ona ba Ministériu Justisa, fiar katak iha tempu badak bele iha ona tradutór lian jestuál iha tribunál sira.
Adjuntu Komandante Jerál PNTL, Komisáriu Mateus Fernandes, hateten ema hotu kuidadu no fó protesaun ba sira ho didi’ak liu-liu ba investigadór sira atu investiga labarik sira tuir lei, no presiza akompañamentu hosi sira-nia inan-aman.
“Nune’e, formasaun ida-ne’e atu hakbiit investigadór sira atu hatoman-an hatene saida mak labarik sira hakarak,” nia dehan.
Tuir Komandante TLPDP, Darren Booy, hateten formasaun ne’e atu ajuda investigadór sira espesialidade iha entrevista ba labarik ho EhD ne’ebé hasoru abuzu.
Tan ne’e, formasaun ne’e sei foka ba prátika di’ak sira iha prosesu investigasaun ba labarik, liu-liu atu hatene kona-ba maneira aprosimasaun.
Jornalista : Osória Marques
Editór : Cancio Ximenes
