Komete atividade ilegál, MAP prosesa ema besik na’in sanulu ba MP
DILI, 13 fevereiru 2023 (TATOLI)—Ministériu Agrikultura no Peska (MAP) liuhosi Diresaun Jerál Floresta Kafé no Planta Indústria, hahú hosi 2022 to’o 2023 prosesa ona ema besik na’in sanulu ba Ministériu Públiku (MP) tanba komete atividade ilegál ba ai protejidu sira.
“Hosi tinan 2022 to’o mai 2023 ita prosesa ona ema besik na’in sanulu ba Ministériu Públiku tanba halo atividade ilegál ba ai protejidu sira,” Diretór Jerál Floresta Kafé no Planta Indústria, Raimundo Mau, dehan ba Agência Tatoli, iha nia-knaar fatin, Caicoli, Dili, segunda ne’e.
Nia dehan, atividade ilegál ba ai protejidu sira mak hanesan, ai-kameli, ai-teka, ai-na, ai-samatuku no seluk tan.
“Ema sira ne’ebé ita prosesa ne’e mai hosi munisípiu sira hanesan, Covalima, Ermera, Baucau, Lautém, Bobonaro, Dili no seluk tan. Dekretu lei, ne’ebé ita uza kriminaliza ba ema sira ne’ebé halo atividade ilegál mak uza dekretu lei ba sistema nasional área protejida númeru 5/2016 no dekretu lei biodiversidade 20/2020,” nia dehan.
Raimundo dehan, ema sira ne’ebé durante prosesa ba MP ne’e, liberta hotu fali hodi fó sansaun selu de’it administrativa no koopera fali ho MAP liberta sasan ne’ebé MAP foti.
“Esforsu ne’ebé ita halo lakohi ema hotuhotu prosesa ba MP. Ita hakarak halo aprosimasaun di’ak ba komunidade oinsá sira hola parte hotu iha protesaun nune’e evita ilegál ne’e,” nia dehan.
Tanba, nia dehan atividade ilegál ne’ebé sira halo ne’e balu tanba nesesidade obriga maibé balu halo atividade ilegál tanba hetan vantajen ekonómiku ne’ebé hariku nia an.
“Maibé ita kontinua halo aprosimasaun ba eskola, komunidade ne’ebé besik liu ba área konsentrasaun ai-laran naturál ne’ebé sai mós fatin horik ba balada sira ne’e, oinsá ita hotu iha responsabilidade kuidadu ai-horis sira no labele kasa animál fuik inklui protezidu sira,” Raimundo Mau hateten.
Nia hateten, kona-ba ema ne’ebé kasa ilegál ba animál fuik ka protejidu sira, parte MAP la prosesa ba MP maibé halo aprensaun ba sira-nia sasán hanesan kilat malu no haruka sira presta deklarasaun no bandu halo tan.
“Ita husu ba públiku kuidadu rekursu ai-laran sira, tanba nia tulun ita la’os agora de’it, maibé jerasaun ba jerasaun. Nune’e ita bele foti ai-hun ida maibé tenke kuda hikas fali nune’e ita-nia rai ne’e bele matak,” nia dehan.
Jornalista : Arminda Fonseca
Editora : Armandina Moniz
