CNE-KPU Indonézia asina akordu iha área kapasitasaun rekursu umanu

DILI, 14 fevereiru 2023 (TATOLI)–Komisaun Nasionál Eleisaun (CNE) Timor-Leste asina akordu ho Komisi Pemilihan Umum ka Komisaun Eleisaun Jerál (KPU-sigla indonézia) iha área kapasitasaun rekursu humanu no dezenvolvimentu instituisaun.

“Instituisaun rua ne’e halo mak hanesan programa dezenvolvimentu no kapasitasaun rekursu umanu, realiza interkambiu hodi hasa’e koñesimentu iha aspetu Teknólojia, Informasaun no Komunikasaun (TIC) relasionadu ho jestaun eleitorál, inklui programa desenvolvimentu rekursu umanu no seluk tan mak hodi hasa’e koñesimentu funsionáriu CNE nian iha área eleitorál,” refere nota imprensa ne’ebé Agência Tatoli asesu, tersa ne’e.

Nota ne’e haktuir, importante seluk órgaun eleitorál rua ne’e realiza mak programa ka atividade ne’ebé bele fó apoiu ba promosaun valór demokrátiku, liuhosi kursu ho nivél superiór iha jestaun eleitorál nian.

Realizasaun asina akordu ne’e iha Bogor, Jakarta Indonézia entre Prezidente CNE Timor-Leste, Jose Agostinho da Costa Belo no Prezidente KPU Indonésia, Hasyim Asy’ari Laž.

Entretantu, hafoin realiza akordu ne’e, líder máximu CNE ne’e sei dezloka mos ba Europa, Portugál.

Jornalista : Osória Marques

Editór       : Cancio Ximenes