ALFela sensibiliza lei tráfíku umanu ba profesór sira iha Covalima
COVALIMA, 16 fevereiru 2023 (TATOLI)–Asisténsia Legál ba Feto no Labarik (ALFela), hala’o sensibilizasaun lei tráfiku umanu ba profesór sira ensinu sekundáriu no pre-sekundáriu iha munisípiu Covalima.
“Ohin loron ALFela hala’o sensibilizasaun lei tráfiku umanu ba profesór-sira ensinu sekundáriu no pre-sekundáriu iha Covalima hodi hasa’e sira-nia koñesementu kona-ba lei tráfíku umanu númeru 3/2017 lei foun presiza halo sensiblizasaun hodi kontribui atu prevene no kombate no protesaun ba vítima tráfíku umanu,” Koordenadór Asuntu Prevensaun no Advokasia ALFela, António Marques, hateten ba jornalista sira iha salaun Servisu Edukasaun Covalima, Santa Rosa, kinta ne’e.
ALFela hala’o sensibilizasaun ba profesór-sira ne’e, hanesan atividade kontinuasaun de’it, ne’ebé hala’o ona iha munisípiu sira seluk no ohin hala’o sensibilizasaun lei ne’e ba profesór sira iha munisípiu Covalima.
“Ita hatene profesór hanesan edukadór no besik liu estudante motiva no fó hanoin ba estudante atu labele envolve no sai vítima ba iha krime trafíku umanu tanba profesór importante atu fahe informasaun ba estudante família no komunidade sira,” nia dehan.
Bazea ba lei númeru 3/2017 asegura hodi fó protesaun ba vítima tráfíku umanu hodi bele asesu sistema formál ne’ebé prevee direitu sira vítima sira atu hetan asisténsia tulun hosi parseiru, sosiedade sivil no Governu.
Profesór, Izau Raimundo do Rego, hateten sensibilizasaun lei tráfiku umanu ba profesór sira durante loron-ida de’it sei la sufisiénte, tanba jeografikamente Covalima fronteira ho nasaun viziñu Kupang-Indonézia.
“ALFela konvida ami mai atu rona informasaun kona-ba lei tráfíku umanu númeru 3/2017 hodi nune’e bele hasa’e ami-nia koñesimentu kona-ba tráfíku umanu,” nia dehan.
Profesór-sira ne’ebé partisipa iha sensibilizasaun ne’e mai hosi ensinu sekundáriu no pre-sekundáriu iha munisípiu Covalima.
Antes ne’e, iha loron 08 fevereiru ne’e, ALFela fó ona sensibilizasaun ba lei tráfiku umanu ba membru PNTL na’in-30, ne’ebé kompostu hosi feto na’in-15 no mane na’in-15.
Jornalista : Celestina Teles
Editór : Cancio Ximenes
