Heineken kontrata Brigada Ambientál na’in sanolu halo limpeza iha Cristo Rei
DILI, 17 fevereiru 2023 (TATOLI)—Kompañia Heineken, sesta ne’e, kontrata Brigada Ambientál na’in sanolu (10) halo limpeza iha área Cristo Rei durante fulan neen.
Brigada Ambientál nain sanolu ne’e kontrata liu hosi serimonia asina memorandum ne’ebe hala’o hosi Sekretáriu Estadu Ambiente (SEA), Demétrio do Amaral, Diretór Kompañia Heineken Timor, Prasantha Manjuka, Diretora Sentru Nasional Edukasaun no Informasaun Ambiental (CEIA,sigla portugés) iha SEA, Amenica Machado Fernandes no reprezenta hosi Brigada Ambientál.
“Akordu ne’e ho nia objetivu ita fó servisu ba ita-nia Brigada Ambientál na’in sanolu ne’ebé sei halo servisu hamoos lixu sira iha área Cristo Rei. Tanba ita hotu hatene Cristo Rei rasik, nu’udar íkone Dili. Ha’u hanoin atividade ne’e la’o tanba durante ne’e sempre hetan apoiu hosi kompañia Heineken,” Demétrio do Amaral, hateten, iha Cristo Reis, Dili.
Membru Governu ne’e dehan, kompañia Heineken rasik durante ne’e, halo kooperasaun di’ak ho SEA ba iha atividade sira hanesan hamos lixu plástiku no apoiu Governu iha prosesu hamatak rai liuhosi kuda ai-oan sira iha fatin oioin.
Iha fatin hanesan, Diretora Sentru Nasional Edukasaun no Informasaun Ambiental (CEIA,sigla portugés) iha SEA, Amenica Machado Fernandes, dehan kontratu ne’ebe halo hosi Heineken ne’e rasik ho durasaun fulan neen iha ne’ebé brigada sira, halo limpeza semana ida dala-tolu.
“Heineken rasik mak toma konta hotu hahú hosi ekipamentu hodi hamoos lixu to’o osan han nia ba sira loron ida $5,00,” nia dehan.
Diretór Kompañia Heineken Timor, Prasantha Manjuka, hateten, nia parte apresia kooperasaun refere no ba oin ho apoiu hosi Brigada Ambientál sira ne’e, sei tau matan ba Cristo Rei durante fulan neen.
“Ha’u fiar katak, kooperasaun ne’e sei susesu ho di’ak no ami sei kontinua atividade ida ne’e sai hanesan projetu ne’ebé di’ak hodi koopera ho setór privadu sira servisu hamutuk ho Governu halo buat ruma ne’ebé produtivu ba nasaun ida ne’e,” nia hateten.
Nia espera ho apoiu limpeza ne’ebé iha ema hotu bele kontente ba haree Crito Rei nu’udar fatin ne’ebé moos no iha ema ne’ebé bele kuidadu.
“Ha’u hanoin, entre hosi ita sira ne’e, mai iha fatin ida ne’e halo ezersísiu no labele soe lixu arbiru maibé tau iha nia fatin, ho ida ne’e sei ajuda malu hodi halo fatin Cristo Rei sei sai di’ak liután,” nia hateten.
Prezidente Autoridade Munisípiu Dili, Guilhermina Filomena, fo agradese barak ba kooperasaun Heineken ho SEA ne’ebé halo limpeza jerál iha Cristi Rei.
“Loloos ida ne’e responsabilidade Autoridade Dili nian, maibé Governu ho nia parseiru sira mós apoiu ami ida ne’e. Tanba ne’e, ami agradese tebes,” nia hateten.
Hafoin asina nota entendimentu, funsionáriu sira hosi Heineken Timor, SEA, Bee Timor-Leste, Empreza Públika (BTL,E.P) hosi munisípiu Dili inklui Brigada Ambientál sira, halo limpeza jerál iha área Cristo.
Jornalista : Arminda Fonseca
Editora : Armandina Moniz
