Mate isin Orlando Martins ho Riando Falo to’o ona Oé-Cusse
OÉ-CUSSE 18 fevereiru 2023 (TATOLI) – Mate isin Orlando Martins no Riando Falo, sábadu ne’e, to’o ona iha rai moris fatin Rejiaun Administrativa Espesiál Oé-Cusse Ambeno (RAEOA), hafoin translada hosi mortuáriu Hospitál Nasionál Guido Valadares (HNGV) liuhosi transporte terrestre.
Mate isin matebian, Orlando Martins no Riando Falo to’o iha Oé-Cusse liuhosi odamatan fronteira Wini Sakato, ho karreta funérariu rua iha oras 13:00 ne’ebé simu direta hosi família no lia-na’in-sira hamutuk ho komunidade sira iha Oé-Cusse.
“Ohin família bo’ot simu imi na’in-rua nia isin mate, mai Oé-Cusse hanesan rai moris fatin ho matak malirin, karik durante ne’e imi-nia viéjen nakonu ho terus, ita hotu entrega ba Nai Maromak”, Lian Na’in José Marques, iha nia lian Dadolin, ne’ebé simu iha fronteira Sakato.
Hafoin rAmata seremónia kulturá ne’e, família no komunidade akompaña hosi Polísia Nasonál Timor-Leste lori transporta mate isin joven na’in-rua ne’e, ba sira-nia rezidénsia iha bairru Palaban, aldeia Sanane, suku Costa sub-rejiaun Pante Makasar.
Entretantu, Joven na’in rua ne’e lakon vida bainhira hala’o viajén ba Santuáriu Inan Feto Ramelau, munisipíu Ainaro iha loron 08 fevereiru 2023, no ekipa konjunta komposta hosi Komandu Polísia munisipíu Ainaro, Bombeiru, autoridade lokál, juventude no família sira hetan hikas Riando Falo iha loron 14 fevereiru 2023 no Orlando Martins hetan iha loron 16 fevereiru 2023.
Jornalista: Abílio Elo Nini
Editór : Florencio Miranda Ximenes
