PA RAEOA ho komunidade akompaña levantamentu projetu estrada Pante Makasar – Nítibe
OÉ-CUSSE 20 fevereiru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), segunda ne’e hamutuk ho komunidade suku Lifau no Taiboko akompaña ékipa téknika sira halo levantamentu ba projetu estrada nasionál hosi sub-rejiaun Pante Makasar ba Nítibe.
“Ohin ha’u mai hamutuk ho komunidade sira atu akompaña tékniku sira halo levantamentu ba estrada nasionál ne’e, iha semana kotuk autoridade konkorda ona liuhosi diskusaun iha suku Lifau, tán ne’e mak ohin ekipa sira tún iha terrenu atu sukat rai, haree ai-oan no uma inklui bee-moos ne’ebé hetan afeta iha projetu ne’e,” Arsénio Paixão Bano, ko’alia iha suku Taiboko, sub-rejiaun Pante Makasar.
Nia informa, projetu ne’e sei afeta ba komunidade sira-nia patrimóniu, ekipa tékniku sira mai hosi Diresaun Rejionál Infraestrutura, Agrikultura, Departamentu Eletrisidade, servisu Água Saneamentu, Terra Propriedade, rejista ona.
Nune’e bainhira levantamentu dadús konklui hosi suku Lifau to’o Suni-Ufe sei tama ba faze pagamentu ba plantasaun, bee-posu, uma, maibé kona-bá rai afeta ba rai, daudaun ne’e Autoridade sei hein rezolusaun ida hosi Governu Sentrál maka hafoin halo pagamentu ba komunidade afetadu ba rai.
“Ha’u hanoin laiha problema tanba autoridade ho komunidade konkorda ona, tán ne’e ohin ita mai hamutuk ho komunidade atu haree direita ekipa sira halo levantamentu ne’e, karik iha buat balu ita presiza ko’alia didi’ak rezolve daudaun, projetu kontinua la’o,” nia afirma.
Iha sorin seluk, João da Costa, nu’udar Dato (naijuf) suku Lifau, agradese, tanba rezultadu diskusaun ne’ebé realiza iha semana kotuk, iha segunda ne’e konsege ezekuta, hodi observa direita komunidade sira-ne’ebé hetan afeta, presiza tau atensaun iha futuru.
“Ba dezenvolvimentu ne’e komunidade la impede nia prosesu, importante ko’alia didi’ak, mai vizita beibeik fó informasaun klaru, tanba ami mós hakarak Governu hadi’a ami-nia estrada, atu bele asesu ba merkadu, tanba ami dezde uluk, kondisaun estrada mak hanesan ne’e ona, agora Governu iha ona hanoin, ita atenke kontribui,” nia katak.
Entretantu, projetu ne’e Autoridade RAEOA, hahú halo lansamentu iha 19 agostu 2022 no distánsia konstrusaun estrada nasionál pakote I ne’e hamutuk kilómetru 18, hahú hosi ponte Noefafan, suku Lifau, envolve suku Taiboko, sub-rejiaun Pante Makasar to’o Oénunu, suku Suni-Ufe, sub-rejiaun Nítibe.
Nune’e projetu realibitasaun estrada nasionál, ezekuta hosi empreza internasionál PT. Waskita Karya, Tbk, ho valór kontratu millaun $23, ne’ebé autoridade RAEOA prevee hosi Orsamentu Jerál Estadu (OJE) 2022 ho durasaun servisu durante fulan 18.
Notísia relevante: RAEOA submete ona proposta rezolusaun ba Governu Sentrál atu indemniza rai afetadu projetu ZEESM
Jornalista: Abílio Elo Nini
Editór: Evaristo Soares Martins
