Jornalista na’in-ualu tuir kolókiu públiku atu hetan karteira profisionál
DILI, 21 fevereiru 2023 (TATOLI)—Conselho de Imprensa (CI) tersa ne’e, fasilita jornalista na’in-ualu hodi tuir kolókiu públiku durante fulan ida-nia laran ne’ebé hahú hosi tersa (21 fevereieru) to’o 21 marsu 2023.
Diretór Ezekutivu CI, Rigoberto Monteiro, hateten, jornalista estajiária sira ne’e kumpre tuir lei komunikasaun sosiál nian no ho nia objetivu mak atu hakle’an no hametin estajiária sira-nia abilidade jornalizmu nian.
“Kolókiu públiku ne’e hanesan prosesu ida Conselho de Imprensa (CI) hala’o nune’e jornalista sira bele hetan karteira profisionál,” Diretór Ezekutivu Conselho de Imprensa (CI), Rigoberto Monteiro, hateten iha abertura kolókiu públiku ba jornalista na’in-ualu, iha salaun enkontru CI, Quintal Boot, Dili.
Iha kolókiu públiku ne’e sei oferese matéria kona-ba étika jornalizmu, elementu jornalizmu 10, matadalan mídia sosiál, jestaun editoriál, papél mídia hodi harii demokrasia, papel mídia hodi prezerva memória pasada, lei komunikasaun sosiál no kódigo penál artigu 285, jornalizmu ho perspetiva jéneru, papel mídia hodi promove direitu umanu, jornalizmu ambientál no pás no jornalizmu inkluzivu.
Diretór Ezekutivu ne’e esplika, karteira profisionál ne’e hanesan rekoñesimentu ida hosi Estadu ba servisu jornalista sira-nian.
“Ha’u hanoin dezenvolvimentu kompeténsia téknika profisional nian ne’e ralasiona ho ita-boot nia kapasidade entermu oinsá hakerek entrevista, hakerek notísia, halo edisaun ba notísia, halo vídeo no áudio no kapasidade seluk mak kapasidade dezenvolvimentu profisional jornalista nian liga ba kode étika jornalizmu, jornalizmu dadus hanesan asesu data Orsamentu Jerál Estadu nian, no ikus mak kapasidade intelektual hanesan tékniku, nune’e hetan sertifikadu ba asuntu espesifiku,” nia dehan.
Jornalista na’in-ualu ne’ebé tuir kolókiu públiku ne’ebé mak jornalista na’in-rua hosi Agência Tatoli, Grupu Mídia Nasionál (GMN) na’in-ida, Gardamor na’in-ida, hosi Rádio Liberdade na’in-ida no na’in tolu hosi Rádio Televizaun Timor-Leste (RTTL).
Jornalista : Osória Marques
Editór : Cancio Ximenes
