DILI, 23 fevereiru 2023 (TATOLI)– Governu aprova ona projetu dekretu-lei, ne’ebé aprezenta husi Vise-Ministru Komérsiu no Indústria, Domingos Lopes Antunes, kona-ba rejime jerál kontrolu metrolójiku legál.
Ministru Prezidénsia Konsellu Ministru, Fidélis Magalhães, informa projetu dekretu-lei ne’e atu estabelese rejime kontrolu ida ba métodu no instrumentu mediasaun sistemátiku no koerente nian, tuir prátika di’ak sira hosi sistema kontrolu metrolójiku nian ne’ebé adota iha panorama internasionál.
Governante ne’e esplika katak dekretu-lei ne’e mós nu’udár estabelesimentu kontrolu metrolójiku ida ne’ebé organizadu, sériu no transparente sei garante ezatidaun, rigór no transparánsia ba medisaun sira iha domíniu oioin sira.
“Hanesan komérsiu, fisku, enerjia no saúde, nomós hodi aumenta krebilidade iha tranzasaun komersiál sira, hanesan ezemplu, atu asegura konsumidór sira kona-ba produtu sira ne’ebé loloos iha fatin komérsiu retallu ka medisaun rigorozu kombustivel nian iha fatin gazolina”, Fidélis afirma iha Palásiu Governu.
Jornalista: Antónia Gusmão
Editora: Maria Auxiliadora
