DILI, 24 fevereiru 2023 (TATOLI)— Sekretáriu Estadu Kooperativa (SECoop, sigla portugés), Elizário Ferreira, hateten sidadaun timor-oan ne’ebé envolve ona iha vida kooperativa hamutuk 118.000.
Nia dehan, sidadaun timor-oan ne’ebé envolve ona iha vida kooperativa liuliu iha kooperativa Kréditu Uniaun no Kooperativa Produsaun hamutuk 118.000.
Sekretáriu Estadu ne’e hateten, kooperativa iha territóriu laran hamutuk 452, kompostu hosi Kooperativa Kréditu Union iha 127 no Kooperativa Produsaun hamutuk 325.
“Hosi ita-nia kooperativa sira ne’e kapitál ne’ebé sira rai hamutuk miliaun $38 resin,” Elizário Ferreira, hateten liuhosi nota komunikadu ne’ebé Agência Tatoli, asesu sesta ne’e.
Nia dehan, antes ne’e sidadaun ladún barak mak envolve iha vida kooperativa, maibé hafoin hetan formasaun hosi parte SECoop dada sidadaun hotu nia atensaun hodi envolve an iha vida kooperativa.
“Dadaun ne’e, Sekretáriu Estadu Kooperativa kontinua apoiu formasaun kontabilidade ba kooperativa sira iha Timor-Leste tantu hosi Kooperativa Kréditu Uniaun inklui mós Kooperativa produsaun sira. Ida ne’e halao atu oinsá dirijenti sira tenke iha karakter kooperativa. Katak, hahú umildade, dezenvolve ho onestidade, no kontrola ho simplesidade nune’e kooperativa bele iha ninia sustentabilidade ba futuru ho di’ak liutan,” Elizário dehan.
Haree númeru envolvimentu timor-oan barak tama iha vida kooperativa nia parte apresia ho autoridade lokál sira iha Timor laran tomak. Tanba, bele envolve direita ona iha kooperativa espera katak envolvimentu ne’e sai hanesan motivasaun ida ba povu sira atu envolve hotu iha vida kooperativizmu.
Jornalista : Arminda Fonseca
Editora : Armandina Moniz
