DILI, 02 marsu 2023 (TATOLI)—Prezidente Komisaun Nasionál Eleisaun (CNE), José Agostinho da Costa Belo, hateten paktu ba Eleisaun Parlamentar sei envolve relijiaun sira iha Timor-Leste.
Notísia Relevante: CNE kria paktu dame ba partidu polítiku maibé kontinua insulta malu
“Paktu ba ita-nia eleisaun parlamentar tinan ida-ne’e, ita halo modelu seluk no sei la hanesan ho tinan kotuk nian, tanba ita haree paktu ne’ebé ita lansa ne’e laiha valór. Nune’e, ita hanoin atu muda modelu mak sei involve parte relijiaun sira hanesan katólika, protestante, musulmanu, no relijiaun sira seluk tan,” Prezidente CNE ne’e hateten ba Agência Tatoli, iha nia kna’ar fatin Colmera, Dili, kinta ne’e.
Nia hateten, tinan uluk bainhira paktu bolu lia-na’in hosi munisípiu sira hotu maibé tinan ne’e sei involve mós relijiaun sira hotu hodi halo inkulturasaun atu bele halo kultura no relijiaun sai ida-de’it.
Prezidente CNE ne’e hatutan, paktu ne’e hanesan konseitu ida nune’e presiza partidu polítika hotu-hotu nia kontribuisaun hodi nune’e bainhira realiza paktu tenke la’o ho di’ak.
“Importante efetivu se bainhira asina de’it la halo tuir. Maibé paktu sai realidade mak tenke iha kompromisu hosi partidu sira sira,” nia hateten.
Nia deha,n CNE preparadu no programadu ona atu realiza paktu iha tempu badak tanba kampañia eleitorál mós besik ona.
Jornalista : Osória Marques
Editór : Cancio Ximenes
