Alin Laek: Dezenvolve TL presiza responsabilidade no unidade nasionál
DILI, 03 marsu 2023 (TATOLI)–Veteranu Costodio Belo “Alin Laek” hateten, atu dezenvolve Timor-Leste presiza iha responsabilidade, dignidade, fiar mak importante no tenke kaer metin unidade nasionál.
Notísia Relevante: “Tara” triste Xanana Gusmão la partisipa iha komemorasaun loron nasionál veteranu
“Hanesan ita hotu hatene katak ita luta durante tinan 24, moris iha situasaun ida-ne’ebé defisil no barak mak mate maibé balun to’o agora seidauk hetan nian ruin, tanba ne’e presiza kaer metin unidade nasionál, atu labele haree ba ema sira-ne’ebé boot ona maibé haree ninia responsabilidade, dignidade, prestijiu no fiar, ida-ne’e importante,” Veteranu Costodio Belo “Alin Laek” hateten ba Agência Tatoli hafoi partisipa serimónia komemorasaun loron nasionál veterenu ba dala-VI iha Sentreu Konvensaun Dili (CCD, sigla postugés), sesta ne\e.
Iha komemorasan loron nasionál veteranu ne’e, nia hakarak husu ba joven no estudante sira-ne’ebé mak sai jerasaun foun no jerasaun kontinuador tenke hatudu sira-nia intelektuál iha sosiedade nia leet, labele envolve polítika ne’ebé fahe malu maibé involve hodi oinsá bele halo dezenvolvimentu ba povu no nasaun ne’e ba oin.
Alin Laek hateten, joven sira tenke esforsu no banati saida mak veteranu no veterana sira hatudu hodi sikrifika sira-nia moris tomak durante tinan 24 iha ai-laran luta ba libertasaun nasionál to’o Timor-Leste hadau ukun rasik-an.
“Ami-nia kontribuisaun mak luta kontra inimigu hodi liberta pátria no agora ami idade reforma ona, no imi mak hela hodi kontinua no dezenvolve ita-nia país ba moris di’ak,” nia hateten.
Selebrasaun loron nasionál veteranu iha 03 fulan-marsu ba tinan 2023 ne’e ho tema ” Hametin Unidade ba Dezenvolvimentu Nasional”, katak atu bolu líder nasionál hamutuk hodi harii pás no estabilidade.
Jornalista : Osória Marques
Editór : Cancio Ximenes
