Fumadór 803 hapara ona fuma liuhosi Sentru Saúde Formoza
DILI, 07 marsu 2023 (TATOLI) – Responsável Sentru Hapara Fuma Médiku Jerál, Eldino de Castro Rangel, informa dezde 2021, fumadór hamutuk 803 mak hapara ona fuma liuhosi tratmentu iha Sentru Hapara Fuma Formoza.
“Hahú iha 2021 to’o agora, totál pasiente ne’ebé mak rejistadu husi estabelesimentu Sentru Hapara Fuma hamutuk 1.093, husi númeru ne’e, ema ne’ebé kumpre no hapara ona fuma hamutuk 803”, Eldino de Castro Rangel, dehan iha nia kna’ar fatin Formoza, ohin.
Nia informa, pasiente sira ne’ebé hapara fuma, hahú husi idade 17 to’o 40. Hirak ne’e mak asesu mai iha ne’e hodi hetan tratamentu husi médiku sira. Hirak ne’e maioria mai husi Dili, Liquiça, Viqueque no Manufahi.
Aleinde ne’e, Sentru Hapara Fuma koordena no fó orientasaun ba profisionál saúde sira iha sentru saúde haat iha Dili, hanesan Metinaru, Becora, Vera Cruz no Comoro ho objetivu atu fó mós tratamentu ba ema ne’ebé presiza hapara fuma.
“Ami mós distribui ona aimoruk hapara fuma ba sentru saúde Metianro, Becora, Vera Cruz no Comoro atu ema sira ne’ebé hakarak hapara fuma bele asesu iha fatin sira ne’e” nia sujere.
Responsável dehan, pasiente balun hahú fuma fila fali entaun sira kontinua mai halo tratamentu iha ne’e no balun lakon tratamentu signifika sira la mai.
“Sira ne’ebé mak fuma fila fali ne’e hamutuk 77, entaun sira mai ita fó tratamentu ba sira no sira ne’ebé mak lakon tratamentu hamutuk 95”, nia esplika.
Nia haktuir, Sentru Hapra Fuma estabelese tan ba Munisípiu Liquiça, Ainaro, Ermera no Rejiaun Administrativa Oe-cusse Ambeno no tempu badak MS sei estabelese tan iha Munisípiu Lautem Viqueuqe no Same.
Nia rekorda, Sentru Hapara Fuma servisu hamutuk ho MS no Organizasaun Mundiál Saúde hodi apoia aimoruk tanba rekursu umanu sufisiente hodi fó tratamentu ba pasiente sira.
“Kona-ba aimoruk ida taka ba isin (Patch 4mg no 21mg) ne’e mak ita nia estoke mamuk ona maibé ida sumingal (Nicotine Gum 2mg no 4 mg) ne’ebé nata de’it ne’e estoke sei hotu iha fulan oin, entaun ami halo ona pedidiu ba MS no OMS, sira hahú halo kompras atu nunee ita fó atendimentu ba pasiente sira ne’ebé mak hakarak hapara fuma,” Nia konklui.
Notísia relevante : http://Fumadór 14′-resin hahú konsulta atu hapara fuma tabaku
Jornalista : Felicidade Ximenes
Editór : Zezito Silva
