DILI, 08 marsu 2023 (TATOLI)— Diretór Nasional Apoiu Dezenvolvimentu Mikro Pekena no Média Empreza iha Ministério Turizmu Komérsiu no Indústria (MTKI), Bernardino de Menezes, hateten, hahú hosi tinan 2021 to’o 2023 iha ona empreza 40 mak sai benefisiáriu ba programa kréditu suave.
Programa kréditu suave ne’e rasik, hahu kria iha tinan 2021, ne’ebé liuhosi kooperasaun entre Programa Nasoins Unidas ba Dezenvolvimentu (PNUD, sigla portugés) no Governu liuhosi MTKI no Banku Nasional Komérsiu Timor-Leste (BNCTL, sigla portugés) hodi ajuda empreza nasional sira halo investimentu no kria empregu ba populasaun.
“Hosi tinan 2021 to’o mai agora, iha ona ita-nia emprezáriu 40 mak sai ona benefisiáriu ba programa Kréditu Suave ne’ebé ho jurus ka funan kiik 3% iha BNCTL,” Bernardino de Menezes dehan ba Agência Tatoli, iha nia knaar-fatin, Bebora, Dili tersa ne’e.
Notisia relevante : PN aprova adisionál millaun $50 ba MTKI expande implementasaun kreditu suave
Nia dehan, programa asesu ba Kréditu Suave ne’e rasik, iha empreza barak mak aprezenta sira-nia proposta atu asesu maibé 40 de’it mak bele liu tanba priense rekezitu sira ne’ebé BNCTL fo sai.
“Aplikasaun ba kréditu suave ne’e iha empreza oioin mak hatama sira-nia proposta maibé iha empreza 40 mak sai manán na’in tanba priense kritériu hosi BNCTL, nune’e banku rasik fó empréstimu ho montante $600.000. Nune’e empreza 40 ne’e mak hanesan, empreza 20 ba mikro, 19 ba pekena no ida ba média,” nia dehan.
Ba empreza sira ne’ebé seidauk hetan oportunidade, MTKI no BNCTL garante kontinua halo avaliasaun ba proposta foun sira hosi empreza sira ne’ebé atu asesu ba Kréditu Suave.
“Daudaun ne’e, BNCTL halo hela avaliasaun ba proposta foun lima hosi empreza sira, maibé buat balu sei haree hamutuk mós ho ekipa MTKI mak sei halo verifikasaun ba atividade hosi empreza sira, mak foin fó empréstimu tanba ida ne’e rekezitu ida hosi banku,” nia dehan.
Notisia relevante : Empreza 22 sai manán-na’in ba programa kréditu suave hosi MTKI
Empreza sira ne’ebé hetan ona Kréditu Suave hosi BNCTL ne’e, daudaun ne’e sira halo ona investimentu iha munisípiu sira hanesan, Aileu, Ataúro, Baucau, Bobonaro, Dili, Ermera, Lautém, Liquiçá, Covalima no Viqueque, la inklui Ainaro no Rejiaun Administrativa Espesiál Oé-Cusse Ambeno (RAEOA).
Jornalista : Arminda Fonseca
Editora : Armandina Moniz
