Governu presiza tau orsamentu konserva parke nasional rua iha Timor-Leste
DILI, 09 marsu 2023 (TATOLI)— Diretór Organizasaun Naun Governamentál (ONG) Konservasaun Flora no Fauna (KFF), Alito Rosa, hateten, Governu presiza tau orsamentu hodi konserva parke nasionál rua no área protejida 44 iha Timor-Leste.
“Iha Timor-Leste ita-nia parke nasionál rua mak Nino Konis Santana no Kay Rala Xanana Gusmão. Parke rua ne’e kuaze ladún funsiona ho di’ak, maibé futuru Governu presiza tau matan ba parke sira ne’e. Tanba bainhira ita kuidadu no tau matan, liuhosi fatin sira ne’e bele atrai turista sira,” Alito Rosa dehan ba Agência Tatoli, liuhosi entrevista eskluziva, kuarta (08/03) ne’e.
Nia dehan, Governu mos presija tau orsamentu boot oituan ba área Floresta. Tanba área floresta rasik iha Diresaun Floresta mak tau matan ba biodiversidade sira iha Timor-Leste.
“Ita hotu hatene, fatin sira ne’e nu’udar fatin naturál ne’ebé bainhira ita konserva ho di’ak aleinde atrai turista sira, fó mos vantajen ba rai, inklui animál fuik sira,” nia dehan.
Bainhira atividade konservasaun ne’e mak ladún di’ak, nia risku sira mak iha parte foho sei hamosu dezastre naturál, no bee matan sira maran.
Nia husu ba públiku liuliu komunidade ne’ebé moris besik iha área parke nasionál sira tenke, kuidadu fatin sira ne’e no labele estraga ai-horis no animál fuik sira.
“Tanba liuhosi rikusoin animál fuik sira ne’e mós bele promove ita-nia rai. Tanba animál fuik balu bele moris iha de’it ita-nia rai ne’ebé nasaun balu labele hetan,” Alito hateten.
Jornalista : Arminda Fonseca
Editora : Armandina Moniz
