Empreza Toyota hakarak investe iha área indústria automóvel iha Timor-Leste
DILI, 10 marsu 2023 (TATOLI)—Empreza Toyota Tsusho Asia Pacific hosi Singapura, hasoru malu ho Ekipa Ajénsia Promosaun Investimentu no Esportasaun, Institutu Públiku (TradeInvest Timor-Leste), hodi halo diskusaun kona-ba posível iha oportunidade atu investe iha Timor-Leste ba área indústria automóvel.
Empreza Toyota rasik hasoru malu ho TradeInvest iha loron 08 marsu 2023 iha eskritóriu TradeInvest Colmera ne’ebé lidera hosi Diretór Ezekutivu Interinu atuál Diretór Promosaun Investimentu (DPI) Ezaquiel da Costa Babo, ne’ebé akompaña mos hosi Jestora Diresaun Relasaun Esterna no Marketing, Bernardete Maria Afanso no Tékniku Apoiu Diresaun Promosaun Investimentu, Gabriella Yuliana Domingos.
Bazeai ba nota komunikadu ne’ebé Agência Tatoli, asesu sesta ne’e, fo sai katak objetivu prinsipál hosi prezensa empreza Toyota Tsusho Asia Pacific, ne’ebé lidera hosi reprezentante, Masakazu Otsubo no Shina Teo Xue Na, atu hatene kona-ba oportunidade para bele investe iha Timor-Leste.
“Sira mós informa ba TradeInvest kona-ba sira-nia servisu, planu no prioridade ne’ebé iha ba TradeInvest nune’e iha oportunidade atu investe iha setór prosesamentu Indústria automobilístika,” hakerek nota komunikadu.
Diretór Promosaun Investimentu, Ezaquiel da Costa Babo reprezenta Diretór Ezekutivu TradeInvest Timor-Leste hato’o agradese no bemvindu ba ekipa hosi empreza Toyota Tsusho Asia Pacific ne’ebé iha vontade atu halo investimentu iha área refere.
Iha biban ne’e mós Diretor DPI ho ekipa TradeInvest dezimina informasaun sira kona-ba knaar no responsabilidade hosi Ajénsia TradeInvest Timor-Leste nian no prosedimentu sira ne’ebé liga ba Lei Investimentu Privadu númeru 15/2017 no dekretu Governu númeru 2/2018.
Empreza Singapura ho naran Toyota Tsusho Asia Pacific Pte, Ltda harii iha loron 03 jullu 1975, ne’ebé daudaun ne’e lidera hosi Mitsuhiro Tsbakimoto ho funsionáriu hamutuk ema 262.
Jornalista : Arminda Fonseca
Editora : Armandina Moniz
