EKONOMIA, BOBONARO, HEADLINE, MUNISÍPIU

Dezastre naturál estraga uma-kioske iha merkadu Hali-Mesak

Dezastre naturál estraga uma-kioske iha merkadu Hali-Mesak

Kondisaun kioske iha merkadu Hali-Mesak, aldeia Ana-hun, suku Odomau, postu administrativu Maliana, munisípiu Bobonaro, ne'ebé hetan estragu hosi dezastre naturál. Imajen Tatoli/Sergio da Cruz.

BOBONARO, 14 Marsu 2023 (TATOLI) – Dezastre naturál estraga uma ida no kioske haat ne’ebé negosiante sira konstrui iha merkadu Hali-Mesak, aldeia Ana-hun, suku Odomau, postu administrativu Maliana, munisípiu Bobonaro no daudaun ne’e atu besik monu totál, tanba impaktu hosi rai-halai hafoin akontese udan-boot durante ne’e.

Enkuantu iha akontesimentu semana dahuluk fulan-ne’e rezulta merkadu tuan ne’ebé governu konstrui, inklui kioske haat ne’e negosiante sira hosi Hauba mak harii.

Abitante suku Odomau, área Hali-Mesak, Paulino Ricardo, sente triste tanba merkadu refere foin konstrui fulan-lima de’it natureza hahú estraga ona.

 Notísia relevante: Rai-halai estraga kioske iha merkadu Hali-Mesak

“Iha tempu ne’ebá udan mak’as, ita hotu haree merkadu ne’e estraga, ita-nia bee-dalan sira tún mai ne’e mós ladi’ak, entaun tún mai hotu iha-ne’e, tanba momentu ne’ebá IGE ateru rai iha ne’e, entaun rai ne’e semakin todan, entaun udan mai ne’e mak estraga tiha hanesan ne’e,” nia ko’alia iha merkadu Hali-Mesak.

Enkuantu merkedu refere inaugura hosi Primeiru Ministru, Taur Matan Ruak, akompaña hosi Ministru Justisa, Tiago Sarmento Amarál no Prezidente Autoridade Munisípiu Bobonaro, Ernesto de Oliveira Barreto, iha loron 16 fulan-setembru tinan 2022.

Maibé Paulino, rejeita informasaun ne’ebé espalla iha rede sosiál katak Governu apoiu osan ho montante rihun $1-resin hodi konstrui merkadu refere.

“Ita hatete bosok tanba ne’e inisiativa hosi komunidade rasik mak harii merkadu ida-ne’e, ne’ebé antes atu espalla informasaun tún halo justifikasaun ho komunidade, ami konsidera iha VIII Governu altura ne’ebá ita-nia Primeiru Ministru mak mai inaugura, maibé orsamentu ne’ebé maka dehan katak gastu ho rihun $15 ne’e laloos ida,” nia argumenta.

Iha momentu inaugurasaun, Xefe Governu, Taur Matan Ruak, bandu komunidade sira haluan tán espasu tanba rai iha parte Hali-Mesak hanesan ema ida karik ruin laiha, nune’e bainhira akontese udan-boot sempre sai risku ba dezastre naturál.

“Ami komunidade sira-ne’ebé maka halo merkadu ida-ne’e, inisiativa rasik atu kontinua hadi’ak merkadu ida-ne’e, hola bronjong rasik atu prezerva fatin ida-ne’e, tanba ami lakon tiha osan hakarak ka lakohi nafatin kontinua halo, la hein de’it hosi sé mak atu fó apoiu,” Paulino afirma.

“Ita-nia prezidente autoridade seidauk marka prezensa iha-ne’e atu halo justifikasaun ho ami, realidade seidauk akontese, maibé ita nafatin hein prosesu to’o bainhira, maibé ami komunidade iha inisiativa atu halo rasik, bailoron ami rasik halo,” nia hateten.

Enkuantu estabelesimentu merkadu ne’e tanba haree ba makro hodi kontribui ba programa governu kadeia valór, no haree ba makro boot-liu.

Nune’e mós haree ba mikro ida ki’ik ne’e atu hapara urbanizasaun katak komunidade hotu ninia atividade negósiu labele konsentra de’it iha kapitál munisípiu, no razaun seluk mak atu estímula produtu lokál oinsá agrikultór sira hasa’e produsaun agríkola.

Notísia relevante: PM Taur inaugura merkadu Hali-Mesak

Jornalista   : Sergio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!