SEA ho empreza rua sei sosa fugaun poupa enerjia hamutuk 200.000
DILI, 21 marsu 2023 (TATOLI)—Sekretária Estadu Ambiente (SEA), asina akordu ho empreza privada rua, Eco Security no Emission Asset. Empreza privada rua ne’e sei sosa fugaun poupa enerjia hamutuk 200.000.
“Ohin ita hamutuk ho empreza privada halo asina nota entendimentu kona-ba fugaun poupa enerjia nian ne’ebé sei sosa hosi empreza privada rua ne’e hamutuk 200.000. Fugaun poupa enerjia ne’e sei distribui ba uma-kain sira iha territóriu laran ne’ebé identifika ona ho objetivu hodi hamenus ai-tein iha Timor-Leste,” Demétrio Amaral do Carvalho hateten iha salaun SEA, Bebora, Dili, segunda ne’e.
Nia dehan, empreza sira ne’ebé ohin asina akordu ho SEA distribui fugaun jumbu ba komunidade. Aleinde sosa fugaun sira mós apoiu SEA iha programa reflorestasaun iha Timor-Leste.
Nia hateten, distribui ba fugaun poupa enerjia ne’e importante tebes tanba tuir dadus ne’ebé SEA hatene, iha Timor-Leste uma-kain 98% mak uza ai-sunu hodi tein hahán no iha 10.000 mak iha kbiit uza liña eletrisidadede ka gas hodi tein.
“Nune’e iha oportunidade ida ne’e, ita hamutuk ho empreza internasionál konverte teknolójia sai fugaun tein, ita halo modifikasaun no inovasaun mak fornu ekonómia enerjia ne’e. Ha’u koko iha uma ona ita bele redús ai sunu 60%, nune’e ita distribui fornu ekonómia enerjia, ba uma-kain sıra iha Timor laran tomak hodi uza ida ne e. Ita sei redus ai-sunu ne’e ba to’o 60%. Ida ne’e sei hadi’a ambiente,” nia dehan.
Diretór Ezekutivu Kompañia Eco Security, Paulo Fernandes, hateten ninia kompañia rasik parseria ho Governu Timor-Leste, hodi servisu hamutuk apoiu komunidade lokál sira uza fugaun jumbu hodi hamenus uza ai-sunu ba tein.
“Fugaun ne’ebé ami sei sosa hamutuk 200.000 no orsamentu ne’ebé ita sei sosa fugaun ne’e hamutuk milliaun $20. Ne’ebé tinan ne’e, ita sei distribui ba komunidade iha Aileu, Liquiça no Dili. Distribuisaun ne’e rasik la’o durante tinan lima nia laran,” nia hateten.
Nia afirma, fugaun poupa enerjia hamutuk 200.000 ne’e sira sei sosa hosi nasaun Índia no Áfrika.
Jornalista : Arminda Fonseca
Editora : Armandina Moniz
