DILI, 23 marsu 2023 (TATOLI)-Diretór Servisu Munisipál Jestaun Merkadu no Turizmu, Munisípiu Dili, Arthur Henriques informa Autoridade Munisípiu Dili (AMD) oras ne’e prepara ona rai ektare hamutuk 40.0002 iha área merkadu Manleuana Dili nia kotuk hodi hari’I merkadu ba negosiante sira atu halo negósiu.
“Ami iha ona meiu ida hodi prepara fatin ida ba sira alende merkadu Taibesi ho Manleuana. fatin ne’e mak propriedade Estadu nian iha Governu anteriór tinan 2013 nian ne’ebé mak fó ona indeminizasaun ba ema no rai ne’e ho ekatre metru 40.0002 (40 mil metru kuadradu). Ami identifika no halo ona relatóriu hodi bele prepara ba negosiante sira iha futuru no ida-ne’e mak bele rezolve problema sira-ne’e,” nia dehan ba Tatoli, iha nia knar fatin Matadouro, Dili, kinta ne’e.
Notísia Relevante :Autoridade Munisípiu Dili hahú reabilita Merkadu Manleuana
Nia rekoñese negosiante barak iha Dili, oras ne’e sei okupa espasu públiku hodi faan sira-nia sasán hanesan akontese iha Elemloi, Kampung-baru, Foho Osa mean, Bairru-Pité no Becora II.
“Área lima mak ne’e mak ami preokupa tebes tanba fó risku ba ema la’o ain no mós hamosu engrafamentu inklui negosiante ambulante sira,” nia dehan.
Atu evita mosu engrafamentu iha fatin publiku, ba daudaun ne’e, AMD nafatin orienta ekipa Saneamentu Dili atu kontinua kontrola no halo aproximasaun ho negosiante sira atu kumpre regulamentu ne’ebe iha hodi labele kontinua faan iha fatin públiku hirak ne’e.
“Kuandu beibeik ne’e ami prende sira-nia sasán hodi halo termu entrega ida hodi fó ba uma mahon sira iha Dili laran hanesan orfonatu Balide,” nia esplika.
Notísia Relevante :AMD seidauk iha fatin ba negosiánte munisipál hala’o negósiu iha Dili
Jornalista : Osória Marques
Editór : Agapito dos Santos
