AMD seidauk iha fatin ba negosiánte munisipál hala’o negósiu iha Dili
DILI, 05 setembro 2022 (TATOLI)—Adjuntu Prezidente Autoridade Munisípiu Dili (AMD), António Moniz Clau, informa Autoridade Munisípiu Dili seidauk iha fatin adekuadu ba negosiante sira hosi munisípiu (munisipál) hodi halo atividade negósiu iha Díli.
Notísia Relevante: Negosiante munisipál husu autoriedade Dili prepara fatin hodi evita faan iha trotoár
“Em prinsípiu dekretu lei 33/2008 bandu totál vendedór sira labele faan fiksu iha trotoar leten. Agora se sira atu faan movel iha Dili laran, ita la bandu maibé dehan fatin adekuadu atu tau hotu sira iha fatin ida, dadaun ne’e Munisípiu dili seidauk iha, pois itaa ita haruka ba merkadu Manleuana no Taibes. Bainhira sira hosi foho tun mai faan fatin iha ne’ebé, ida-ne’e ami seidauk iha fatin ne’e, maibé se de’it mak iha Dili laran atu faan iha trotoár, ida-ne’e tuir lei labele,” António Moniz Clau hateten ba Agência Tatoli, iha nia kna’ar fatin, Díli, segunda ne’e.
Tanba ne’e, nia husu ba timoroan hotu liu-liu komunidade sira hosi munisípiu seluk mai halo atividade negósiu iha Dili, tanba Dili ema hotu nian nune’e sidadun hotu tenke mai hamutuk fó liman ba malu, halo buat ne’ebé di’ak ba munisípiu Dili.
Ba vendedór hosi munisípiu sira-ne’ebé lori produtu lokál atu hala’o atividade negósiu iha fatin ne’ebé, nia hatán, baibain vendedór hosi munisípiu bainhira lori produtu ho transporte tama Dili ne’e, mai kedas iha fatin ne’ebé vendedóres ambulante sira atu sosa.
“Ezemplu, iha Taibesi, dala ruma sira hasoru malu iha Hali Laran no Merkadu Manleuana dala ruma hasoru malu iha Tasi-Tolu. Maibé ida ai-leba sira tun mai livre faan iha Dili laran ne’e, importante mak labele soe foer arbiru, maibé faan iha trotoár leten fiksu ida-ne’e ita bandu,” nia dehan.
Jornalista : Nelia Fernandes
Editór : Cancio Ximenes
